Shillong, June 28: Meghalaya-ni manderangna sualna miksonggipa mirong bosta laksako Assam Boko-ni ge·sa private godown-oniko Assam police-ni man·gipani bidingo jakgitele sandiataniko dakna sorkarini tik ka·anganiko a·dokni skotong minister Pa Conrad K. Sangma, Sombar salo parakataha.
“Mamingo donmitapani gri ong·aniko ramram manderangba ma·sie ra·enba chu·ongnikchina, ia mamlako sandirokatchina gita chinga enquiry commission-ko songgen ine Pa Sangma, kobor ra·timgiparangna agan-talataha.
Songsul Assam-ni Boko-o mirongrangko man·ani ja·man, ICDS scheme-ni ning·o supplementary nutrition programme (SNP)-ko ra·gate on·anirango tik ong·gijaniko matnangangani ja·man skotong minister iako parakataha.
Kamko salsa ba salgnini gisepon a·bachenggen ine talatengon, enquiry committee-ko kamoni neng·takgimin judge-chi dilgen aro iani report-ko on·china gita uamangna jagni ba jagittam somoirangko on·gen ineba Pa Sangma u·iataha.
A·dokni manderang ia mamlani gimin sing·tokenga, indake chu·gimik talatanirangko manderangni nangnika gita on·na sorkari kusi ong·gen ineba ua aganaha.
Uni aganani gita, iani gimin chanchianio adita jajaanirang manderango gnang maina badiaba dolrang iani kakketko aro ma·sianirangko aro badiaba ong·nikgipa kattarango pangchake bilding-bildang ong·atna gita jottonrang ka·enggipa dongnaba gnang.
“Uni gimin chinga iano maming donmitapa gri ong·aniko nangnikenga aro matnanga gita mirongrangko jakkalsretani ba cha·boke cha·anirang dongja ine a·dokni manderangna ka·dongatanikoba on·na nangnikenga. Manderango chu·ongnikaniko on·na, ia obostako chinga jakgitele sandiatgen,” ineba Pa Sangma talataha.
Ua bosturangni gimin sorkario donggipa report-ni gitade iako jagittam prako changsasan tik dake donenga ine aganenba ia pilakni giminba sandiatanirangko dakchina ine skotong minister, sing·anina aganchakaha.
Pilak skulrangkon chiptokenganio midday meal scheme-ni ning·o mirongrangko on·ani bidingo sing·anina, skul nokrango ong·gijaba mirongrangko bi·sarangna on·enga ine Pa Sangma talataha.
“Antisana skang, ia mirongrangko man·soenggipa bi·sarangni noksako Garo Hills-chiniko anga man·soaha, uni gimin skulrang dongjagenchimoba uamangna mirongrangko on·enga,” ine agane, iani giminba sandiataniko dakangjolgen ine skotong minister agandapataha.
