Shillong, Dec 9: A·doko kal·susaani a·bako namdapatna gita Meghalaya sorkarini ja·kurangko de·atenganio, East Khasi Hills-ni Jongksha-o Indoor stadium-ko rikna gita a·dokni skotong minister Pa Conrad K. Sangma da·al Butbar salo Sports Minister Pa Bantiedor Lyngdoh-ni dongpaanio an·pachakgipa pangchakaniko songaha.
Namgipa gadangni kal·chakram biaprangko rikna gita a·dok sorkari iana tangka gong kror 22-rangko chamaha aro re·baenggipa 2022 bilsini December jaon iako matchotatna gitaba ka·dongsoenga.
The beginning of many firsts! Laid foundation for the Indoor Stadium at #Jongksha funded through @NEC_GoI & State Govt. In line with the Sports & Youth Policy, we are developing infrastructure across #Meghalaya. The Stadium will be completed by 2022 @KirenRijiju @DrJitendraSingh pic.twitter.com/mh9neBm897
— Conrad Sangma (@SangmaConrad) December 9, 2020
Tom·ao bakko ra·giparangna aganprakengon, kal·chakram biaprang aro kal·susaani a·bako namdapatna on·kange kamrangko ka·anina Pa Conrad Sangma, a·dokni Sports Minister-ko dintangmancha de·mittele aganaha.
A·dokni pilak chasong damberangni namgnina on·kange kamrangko ka·na gita sorkari re·mikkangenga aro kal·chakram biaprangko tarina gita miksonganirang gnang kamrangko ka·atenga ineba ua u·iatjolaha.
Kal·susaani a·bao changgipa-sapgiparang gnangni aro uarangna nanggiparang chu·onga gita donggijani bidingo agananio, An·chingo changgipa-sapgiparang bang·en gnang. Indiba uamangna nanggipa biaprang dongja baksana uamangna agan-ku·pattigipa chu·onge dongjani a·selo, chadamberang uamangni chu·gimik changa-sapanirangko mesokna gita cholko man·tokjaenga. Uandakgipa chadamberang maidakode an·tangtangni changa-sapanirangko namdapatna cholrangko man·gen ia dingdingo re·mikkange sorkari kamrangko ka·atenga, ineba ua aganaha.
Meghalaya Youth Policy ru·utgijan bimang ong·gnok ine parakatanio, an·chingni chasong damberangni bil gnanganirangko maidakode nambate nirokatna man·gen uana gital a·bachengatanirangko bak man·atenga. Chasong damberangko namgipa ramaona dilna gita samtangtangkon chinga bimang ong·atgen ine on·kanggimin sorkari ong·e chinga chadamberangna ia ku·rachakaniko on·enga, ine ua aganaha.
Programo, batanggimin salrango a·jao, a·doko aro ma·mongni gadangrango dingtang dingtang dake susaanirango chu·sokgipa chadamberangkoba apsan salo skotong minister aro Sports Minister-maangchi mande ra·anikoba dakjolaha.
Unomiting, a·jolni manderang ia namgipa cholko ra·e nangdimatgipa rama-jal·angrangko tariatchina aro PHC-ko ra·doatchina gita mol·mole skotong minister-ni nirokataniko am·e memorandum-koba on·angjolaha, jenan skotong minister uni agananio, Jongksha-ni PHC-ko ru·utgijan CHC-ona ra·doatgen aro namen namjabeenggipa nangdimatgipa rama-jal·angrangkoba tarina bilko on·gen ine jolni manderangna ka·dongataniko on·aha.
