Tura, Aug 24: Bading chiwalani kamrangchian Meghalaya a·dokni gamchatgipa gam-jinrangko jakkalna man·gen ine Mongolbar salo a·dokni Chief Minister Conrad K Sangma parakataha.
CM’s E-Championship-ni ning·o seokako man·gipa Cohort-1 entrepreneur-rangni graduation ceremony aro Cohort-2 entrepreneur-rangni on-boarding ceremony-ko ong·atanio bakko ra·e jinmana aganprakangengon, a·doko bading chiwalgiparangko tang·doatna aro dingtang dingtang cholrangko on·na gita sorkari on·kange kamko ka·enga ine a·dokni Chief Minister parakangaha.
E-Championship-ko a·bachengatanichi, bading chiwalanio gisik nanggipa chadamberangko sorkari, ong·katatna man·aha ineba Chief Minister aganaha.
Chief Minister-ni aganani gitade, batanggimin bilsignini gisepo a·dok sorkari, ia program-ko ra·gatanichi chadamberangni bilrangko dingtang dingtang kamrangna jakkalna man·aha.
“Ia E-Championship Challenge-ko chinga bading chiwalanio gisik nangeba chol ong·gijagipa chadamberangna a·bachengataha. Ia program-chian chinga nambatgipa bading chiwalani cholrangkoba sandina man·aha aro bading chiwalgiparangni kamrangkoba tang·doatna man·aha. Bading chiwalgiparangni re·mikkanganio gital dake tang·doataniko man·china chinga gisikni gita aro pilakni gitan dakchakanirangko on·enga,” ine Sangma aganaha.
Ia program-ko ong·atanio Assam-oni bading chiwalgipa sakgni, an·tangtangni bading chiwalani kamrangko ka·ani bidingo jinmana agan-talate on·angjolaha aro uamangara Northeast Farm Sales Promotion-ni Bhanu Pratap aro Aromica Tea-ni Ranjith Baruah ong·a.
CM’s E-Championship 2020 batch Cohort-1-ni entrepreneur-rangba ia program-o an·tangtangni skie ra·gimin kamrangni gimin jinmana agan-talate on·angaha aro ia cholko man·ahani gimin sorkariko mittelpilangtokaha. Ia program-chi uamang tangka paisani gita aro an·tangtangni bading chiwalani kamrangko chalaiangkuna gita dingtang dingtang dakchakanirangko man·aha ineba Cohort-1-ni entrepreneur-rang parakangaha.
Iandakgipa program-ko sorkarini a·bachengate on·aniara a·doko bading chiwalaniko aro chadamberangni changa sapanirangko tang·doatna dakchakani ong·gen ineba uamang parakangaha.
