Tura, March 3: An·tangtangari ama gita chu·gimik daitko ra·enba bading-chiwalani cholko dake-ka·e ra·enggipa a·dokni manderangna dakchakaniko on·angna gita miksonge, a·dokni skotong minister Pa Conrad K. Sangma, Butbar salo Commissioner & Secretary Dr. D Vijay Kumar jean MBMA-ni CEO-ba ong·a, DC-rang aro bading-chiwalani cholrangko dake ra·enggiparang gimikni dongpaanio A·chik a·songni skotong songjinma Tura-o PRIME Hub-ko a·bachengate on·angaha.
A·dokoni an·tangtangarichi bading-chiwalaniko dake-ka·e ra·enggiparangni chagongenggipa dingtang dingtang neng·nikanirangni gimin aganengon, “Meghalaya a·dok, entrepreneurs ba an·tangtangarichi chu·gimik daitoko ra·e bading-chiwalaniko dakenggiparango bang·en ka·dongchakanirang donga. Apsandakgipa biapo ong·pae anga an·tangni ma·sibagiminko aganode, angni IT business-ko a·bachengani somoio maming dakgipa dakchakanirangkon anga man·jaha, mongsongbate uamangko re·dilgipa aro agan-skitime on·gipa darangba dongjaon bading-chiwalaniko dakenggiparangni suk ong·gijanirangko aro uamangna chagronggipa pilak ra·bianirang gimikkon anga u·ichakatenga. Angni poraibagipa Business Administration ong·oba anga, market background aro research-o napeming iarangni giminba ma·sie ra·bana cholko man·aha indiba an·chingoni bang·a manderang indaka cholko man·paja ba bank-rang ba agency-rangoniko tangka ra·srochengna gitaba aro tangka-paisachi dakchakaniko mangmangba man·paja ine skotong minister agan-talataha.
Tura songjinmao PRIME Hub-ko songe on·ani gimin aganengon, Ia PRIME Hub-an chasong damberangni gisepo bading-chiwalgiparangko ong·katatani biap, uamangko gronggrikatani biap aro uamangko bil gnangatani biaprang gita dake kam ka·gen. Dingtang dingtang biaprango PRIME Hub-rangko songanichi an·tangtangarichi bading-chiwalaniko dakchakatenggiparangni adita neng·nikanirangko namate on·anganio dakchakani ong·chongmotgen ine chinga ka·dongenga aro iako a·bachengate on·achi, an·tangtangari bading-chiwalaniko dake ra·na a·bachengenggiparangna pangchakgrikaniko on·e dakchakaniko aro didianiko on·angna gita chinga ka·dongsoenga ineba Pa Sangma, tom·bagiparangna aganprakaha.
