Tura, June 8: Budbar attamchibara Border Guards Bangladesh (BGB)-ni sipairang, Bangladesh a·songchipakni badingsrukgipa manderangko rikbaani ja·man, India a·songni simao donggipa Rongara Imbloka (Waek) A·chik songona napsretbamanaha.
AK rifle aro gol·dik ra·bitgipa BGB-ni sipai sakgni, A·chik songona napsretbae, songni manderangko sing·sandina a·bachengon, songni manderang ka·a ding·chaoe ja·mano BGB-ni sipairangko a·rikgalataha.
Border Security Force (BSF) official-rangni parakatani gitade, BGB-ni sipairang ua somoio, niam gri badingsrukenggipa manderangkosa rim·na rikbaengachim indiba India a·songni ariona sokbaako ma·sijae ia sipai sakgni, South Garo Hills a·jani Rongara Imbloka ba Waek minggipa songo napsretmanaha ine BGB-ni official-rang ja·mano talataniko on·ataha.
“Ia songara a·song damgnini simako fencing kagipani mikkangon ong·e BGB-ni sipairang, niam gri badinggiparangko rim·na rikanio ma·sigijasa ia songo napmanaha. BGB-ni sipairang niamko pe·ahani gimin ja·mano BSF aro BGB-ni flag meeting-ko ong·ataha.
Indake ong·genchimoba BGB-ni sipairang songni manderangkode mamingba dakjaha,” ine Garo Hills-ni BSF official saksa parakataha.
A·song damgnini sima jolrango, niam gri badingsrukgipa manderang aro songni mitam manderang baksa bakrimanirang dongani a·selan ong·gija dakgipa manderangko rim·anio neng·nikanirangko chagrongna nangronga ineba BSF official parakataha.
Indake ong·engon, ia a·selni bidingo talbate ma·sie ra·na gita dolsa police-rangko ia songona am·sandie ra·na gita watataha ine South Garo Hills a·jani Superintendent of Police (SP) Abraham T Sangma parakataha.
