Boko, 01 March: Batanggimin anti-brirangna kingking West Kamrup Forest Division-ni Bondapara Forest Range-ni ning·o donggipa Rajapara jolni buring damsao jakrani ja·o aro dingtang dingtang be·enni bakrango saknaa man·anichi jachange dongenggipa buringni mongma ma·pang mija Mongolbar salo siaha ine koborna u·iataha.
Indake ong·engon, ua jolni manderang mongma ma·pangni re·jitna amgija sae donganiko ma·sienba Bondapara Range Office-ni Range officer, Rimpi Borah-na u·iatahaoba, Assam a·dokni Forest department aro Veterinary department-ni somoi gita nirok-simsakanirangko on·gijanichi mongma ma·pag sina gita nangaha ine jolni manderang matnangattokskaaha.
Iani bidingo Bondapara songoni saksa chadambe Arabinda Rabha-o saknaa man·gipa mongmana sana-bananirangko on·ani gimin sing·on, a·dokoni Forest Department aro Veterinary Department-ko dosi on·enba, matburingrangna simsak-nirokaniko on·enggipa Assam-o ge·gni department-rang donggenchimoba maini gimin ua saknaenggipa mongma ma·pangna chu·onga gita sana-bananiko on·na man·jaha ine Assam sorkariko sing·doangaha.
Koborna u·iatani gita, adita antirangna saknae donge sianggipa mongma ma·pangko Bondapara Forest Range Office-ni ning·ogipa Kukurmara songoni kanggimin buring sambajolo donggipa a·paloniko songni manderang niktokahachim, jeni ja·man Assamese jatni dakbewal gita sianggipa mongmana gamosha aro pul bibalrangko done mande ra·aniko dakataha. Uandake, Rajapara, Dekapara, Kukurmara, Sukuniapara, Sonalipara, Kalitapara, Khorapara aro bang·a gipin songrangoni manderangba a·damona re·batokenba sigimin mongma ma·pangna mande ra·aniko dakangtokaha.
Aganani gitade, mongmani doctor ine Assam-o mingsinga man·pilgipa aro Padma Shree award-ko 2020 bilsio ra·chakanggipa Dr Kushal Knowar Sarma, re·anggipa February 8 tariko medical team aro forest team baksa Rajapara songona re·baahachim, indiba, saknagipa mongma ma·pangko buringchina napangako salgimik ong·pile sandioba nikangchipjae mamingkoba dakgijan uamang re·angpiltokaiahachim.
Iani ja·manchi, chu·onga gita cha·na-ringna man·gija namen bilgriroroenggipa mongma ma·pangko forest department-oni maming nirok-sandiata dongjaha ine songni manderang matnangattokaha aro uamang, mongmako bang·a changon buringoniko nikachim ine aganenba, bang·bata changon buringni mongma jakrangchi neng·nikatako man·genchimoba mongmako chinga olakiani gimin, chinga dingtang dingtang cha·ani bosturangko on·e man·adipetde una nirok-simsakaniko on·aha ineba Arabinda Rabha agandapataha.
Ia mamlani bidingo, 73 no. Paschim Bekeli Gaon Panchayat-ni president Meghali Rabha, man·adipet gong·rakkale nirok-sandiatchina gita Assam State Veterinary Department-ni Director, Indira Kalita-na chittiko sedoatahachim.
Meghali Rabha-ni aganatani gita, Veterinary department-oni saksa doctor, an·tangtangni re·bagniko unbaksa golpoatahachim, indiba uamang re·bajahakon maina, iani ja·mande mamingkoba u·iata dongchipjaha ine talatan baksa, mongmako sanna gita chubatgipa gadangni officialrang baksa agangriktaichina gita jolni manderang uko mol·moltokahachim ineba Meghali agandapataha.
Iana, Indira Kalita baksa agangrikaton, Veterinary department-de noko jilanirang, matchu ba gipin jila-alanirangnasan nirok-simsakanirangko on·na man·aia ine aganatskaaha.
Unbaksana, Bondapara Range Office-ni Range officer, Rimpi Borah-o iani bidingo sing·atskaon, sambajolo cha·amenggipa matchuko rike mongma ma·pang ga·akaoni chakatna amjae siahani gimin knasoaha ine aganatenba, chiroakanani dolsa doctorrang ja·mano postmortem report-na biapona re·batokaha aro mongma ma·pangni sina skangan uni bang·bata be·enni bakrang kam ka·gijaniko uamang agantokaha ine ua agandapataha.
Mongma ma·pangni sianganina forest department-ko manderangni matnangtokegani bidingo sing·on, be·en ning·o bang·en saknaa dongani a·sel doctorrang mongmako nom·bokate sanna gita jechakaha, indioba chingni, cha·anio samrangko brine on·na jotton ka·ahaoba ua cha·jaha ine Borah aganchakaha.
Ia pilakni ja·man, forest officialrang, mongma ma·pangni sichakgipa biap sambajolon garichi a·ako cho·atenba gope galaha.
