Kokrajhar, Jan 24: Bakrimenggipa dingtang dingtang dolrang baksa nangrime Assam a·doko BJP dol sorkariko riktaigen ine da·al Robibar salo Union Home Minister Amit Shah parakatenba, Assam a·doko so·sojengjeng ong·anirangko, niam gri napsrukanirangko aro chi bananirangko bon·atna ku·rachakangaha.
Re·anggipa bilsini December jao, Bodoland Territorial Council (BTC) election-ko chee United People’s Party Liberal (UPPL) baksa council-ko rikna man·ahani gimin iano pangchake Amit Shah, da·o ong·atna sienggipa Assam Assembly election-o chegipa ong·taina ka·dongenganiko parakangaha.
Da·al Robibar salni bako Union Home Minister, Kokrajhar-o jinmana aganprakangengon, Assam a·dokni Tribal jatrangko naljoke rakkina gita a·songni Prime Minister Narendra Modi kam ka·enga ine parakangaha.
Bodoland Accord-na soi ka·aoni bilsisa batangaha aro da·o BTC-ni election-koba tom·tome matchotatna man·ahani gimin ia jolrang namroro silrorobana man·gnok ine Shah parakataha.
Bodo jolrango rama jal·langrangko tarina gita gong kror 500 tangkarangko chamaha aro adita bilsirangni gisepon Bodoland, Assam a·doko nambatsranggipa biap ong·gnok ineba Union Home Minister parakataha.
Iana salsa skangsan, India a·songni Prime Minister Narendra Modi an·tangba Assam a·dokni Sivasagar a·jaona re·bae jolni manderangna aganprakangahachim indiba Citizenship Amendment Act (CAA)-ni giminde uamang sakgnian Assam-ni manderangna mamingkoba janapangjahachim.
Ia CAA-ko re·anggipa 2019 bilsini December jao ra·gatangani ja·man Assam a·dokoba ia CAA-ko ra·galpilchina gita dabitokengachim ine nikna man·a.
Union Home Minister-ni Assam-ona re·baani somoioba All Assam Students Union (AASU) dolni member-rang, Prime Minister aro Union Home Minister-ni Assam-ona re·baaniko jegale CAA-ni lekkarangko so·e galtokaha.
Kokrajhar-ona re·baani ja·mano Union Home Minister, Nalbari-onaba re·ange manderangna aganprakangaha aro BJP dolsan Assam a·doko niam gri napsrukanirangko bon·atna man·gen ine ku·rachakaniko on·angaha.
“Chingna bilsi bonga somoiko on·taibo, chinga Assam a·doko so·sojengjeng ong·anirangko, niam gri napsrukanirangko aro chi bananirangko bon·atgen,” ine Shah aganaha.
Assam a·dokni Assembly election-ko da·o jadokni gisepon ong·atna siengahachim aro BJP dol, Assam a·dokni dam 126 seat-rangoniko ia change komibeoba dam 100 seat-rangko chena miksongengachim.
