Agartala, June 10: COVID-19 sajinmani a•sel, Agartala-oni Bangladesh gita Kolkata-ona bus gari watruraaniko dontongatani ja•man Sukrobar sal dipet ia bus garini re•ruraaniko watna a•bachengpiltaiaha.
Agartala-oni Bangladesh gita Kolkata-ona bus gari wataniko 2020 bilsini March ja dipetan dontongatahachim indiba ia bus garini re•ruraaniko Sukrobar sal dipet, Tripura a•dokni Transport aro Tourism Minister Pranajit Singha Roy baksana Agartala-o Bangladesh Diplomatic Mission-ni Assistant High Commissioner ong•enggipa Arif Mohammad aro Agartala Municipal Corporation-ni Mayor Dipak Majumdar a•bachengate on•angpilaha.
Ia bus garini re•ruraaniko Royal Maitri International Bus Service chalaiangskagnok.
Tripura Minister Singha Roy-ni parakatani gitade, ia ge 40 donggipa bus gari, Sukrobar salko wate antio changdok dake re•ruragen aro ia bus gari, Agartala-oni re•chakatangenba, kontabrini gisepon Dhaka-ona aro konta 19-ni gisepo Kolkata-ona sokegen.
Ia bus gario Tripura-oni Kolkata-ona re•na gita gong 2200 parakosan gamna nangaiani gimin ian Tripura aro salgro salaram a•dokrango songdongenggipa manderangnasan ong•aigija India a•songni gipin bakrangoni manderangnaba namgni ong•gen aro ian salgro salaram jolo bading chiwalaniko aro tourism-ko tang•doatna dakchakaniba ong•gen ineba Roy parakataha.
