Shillong, July 2: Shillong songjinmani Iewduh ba Bazar Bazar-o dokkan dakenggiparangoni bang·batan COVID-ni tikako su·e ra·tokaha ine Hima Mylliem-ni acting Syiem, Paiem Ainan Syiem parakataha.
Bara Bazar-o dokkan dakenggiparangoni 90 percent-de tika su·e ra·tokmanaha aro da·o dokkan dakenggiparangoni sak 331 tika su·kugijagiparang dongkuenga ine Syiem parakataha.
Re·anggipa June 17 tarikoni June 27 tarikona dingtangmancha sorkari, tika su·ani program-rangko ong·atahani gimin ia biapo dokkan dakenggipa aro badinge cha·giparangoni sak 2110-de tikarangko su·e ra·tokna man·aha aro ia sak 2,110-oni sak 754-de gittimtangtangon tikako su·e ra·aha.
Iako hisape da·o Bara Bazar-o dokkan dakenggipa aro bading chiwalgiparangoni 94-95 percent-ni gitade tika su·e ra·manaha ine Syiem parakataha.
COVID-ko warachakna sorkarini dongimin niamrangko ja·rikchina gitaba dokkanrango dongtimgiparangko ge·etmanaha ineba ua aganaha.
Re·anggipa June 16 aro 17 tarikrango East Khasi Hills a·jani district administration aro Hima Mylliem-ni Syiem nangrimenba, Bara Bazar-o bading chiwalgiparangna tikarangko su·e on·angaha aro ia salgnini gisepo gimik sak 500-mangni gita dokkan dakgiparangde tikarangko su·e ra·rikna man·ahachim.
