Shillong, Nov 29: Bangladesh aro India a·song damgnini simarango silchidare palsrukani, ma·manti bosturangko niam gri badinggrikani, bobil dake chakatgipa manderangni re·ruraani aro uandakgipa ma·manti ong·gija kamrangko bilakbate chel·chakangna gita India a·songni Border Security Force (BSF) aro Bangladesh a·songni Border Guards Bangladesh (BGB) dolgnini gisepo songgigrikangaha.
BSF aro BGB dolgnini tom·aniko salgittamna Shillong-o ong·atanganio, simarango dolgnini chel·chakaniko bilakbatatna songgigrikaha.
Ia tom·anio BGB-ni sipairangko BGB South East Region Chattogram-ni Additional Director General, Region Commander Tanveer Gani Chowdhury dilbaaha aro unbaksana Region Commander, NE Region, Sarali, BGB Cumilia, Sylhet, Mymensing-ni Sector Commander-rang aro BGB-ni gipin official-rangba bak ra·angaha.
BSF dolko BSF Tripura Frontier-ni Inspector General Susanta Kumar Nath dilangskaaha aro unbaksana BSF Meghalaya Frontier-ni Inspector General Inderjit Singh Rana aro M&C Frontier-ni Inspector General Designated Mridul Sonowal-ba bak ra·angskaaha.
Ia tom·aniko ong·atani bidingo BSF aro BGB-ni official-rang, kobor ra·timgiparangna talatangengon, simarango kam ka·anirangko ia tom·anio ning·tue nipilangaha aro mikkangchi ia jolrangko ong·gija dakgipa kamrangko mikrakbate nirokangna gita dolgnian songgigrikaha ine BGB-ni ADG Tanveer Gani Chowdhury parakataha.
A·song damgnini simarango songdongenggipa manderangna mikrakatanirangko on·angkuna, kenchakna nangbatgipa biaprango mikrakbate nirokangna aro simarango pekatgipa samrangko badinggrikani bidingo koborrangko on·grikna gita BSF aro BGB dolrang tik ka·aha ineba Tanveer aganaha.
Ia tom·aniko ong·ataniara simarango dolgnini kam ka·anirangko nipiltaina ong·atanisan ong·aija indiba dolgnini gisepo meli nangrimaniko bilakbatatna aro dolsa dolgipinko nambate ma·sigrikna gita ong·ataniba ong·a ineba ua aganaha.
