Guwahati, March 26: Bangladesh a·songni jakgitel ong·ani bilsi 50 gapaniko dal·e manianganio bakko man·pana gita India a·songni Prime Minister Pa Narendra Modi, Sukrobar attamchibara a·songni skotong Dhaka-o onchongeaha. Airport-o onchongani ja·man, Bangladesh-ni Prime minister Ma Sheikh Hasina, India-ni PM-ko pul bibal on·e mande ra·bee rimchaksoaha.
PM Modi salgnina songsul a·songchina wenangaha jeon ua India aro Bangladesh a·song damgnini mikkangchi meli-nangrime kam ka·anirangko bilakdapatangna gita dingtang dingtang agan-chanchigrikanirango bakko ra·angjolgen.
Mija bilsio namjabegipa sajinmachi a·songko simgopdapani ja·man a·songni Prime Minister-ni songsul a·songchina ian skanggipa wenanganiba ong·jolenga.
“Dhaka airport-o namen onchongena man·aha. Airport-o mande ra·bee rimchaksoani gimin PM Ma Sheikh Hasina-ko anga dingtangmancha mittelbea. Angni ianona wenbaanichi a·song damgnini mikkangchi meli-nangrime pilak namroro-silroroatani kamrangko ka·anio bilak-mangrakdapatna dakchakani ong·gen,” ine Prime Minister, tweet ka·ataha.
Indake ong·engon, a·song damgnini nangrime kamko ka·ani gimin agan-golpogrikna ua a·songchi wenanganio manderangko gisik nangatani ong·gipa minggipin bakara, Dhaka-ni Indian High Commission-ni pilak officialrangan a·songni niksenggipa aro mingsinggipa pagipa, Sheikh Mujibur Rahman-ko dal·bee mande ra·aniko dakani gita a·songo namen mingsinggipa ‘Mujib jacket’-rangko pate manianio bakko ra·ani dongjolgen.
Minggipinara, Rahman-ni atchianiko manibaani bilsi 100 ga·dapengahaniko “Mujib Borso” ine biming done ia bilsion manianiba ga·akjolenga.
Ia dingtangmancha maniania High Commission, Khadi and Village Industries Commission (KVIC)oniko kra-ma·gape tarigimin king 100 Khadi Mujib jacket-rangkoba bresoaha.
