Delhi, Dec 6: Bangladesh a•songni Hindu-rangna India sorkari, re•baenggipa January ja dipet citizenship-ko ba India-o songdongkamna on•naba gnang ine BJP-ni general secretary Kailash Vijayvargiya parakataha.
“Citizenship (Amendment) Bill-ko Parliament-ko pass ka•manahaoba ia Act ba niamko West Bengal-ni chief minister Mamata Banerjee aro gipin jegalenga aro Supreme Court-onaba re•angaha. Bangladesh a•songni Hindu-rangna 2021 bilsini January ja dipet citizenship-ko on•na BJP manchiangaha,” ine re•anggipa Sonibar salo BJP-ni general secretary, New Delhi-o kobor ra•timgiparangna parakataha.
Vijayvargija-ni kobor ra•timgiparangna parakatani gitade, Citizenship (Amendment) Act-ko pass ka•manahani gimin Bangladesh, Pakistan aro Afghanistan a•songrango toromni a•sel a•rikgalako man•e India-o katnape songdongenggipa manderangna re•baenggipa January ja dipet BJP sorkari, citizenship-ko on•gnok.
“Chinga jekon a•bachengo manderangna ku•rachakahachim, uko chinga chu•sokate on•gen,” ine ua aganaha.
Da•o dipet CAA-ni bidingo u•iataniko on•kujaengani gimin niamrangko ra•gatkujaengachim ine nikna man•a.
Ia CAA-ko ra•gatanichi salgro salaram a•dokrangosa nangchakeaniko man•batgen ine kenchaksoenba ia CAA-ko salgro salaram a•dokrango raken jegalsotokahachim ine nikna man•a.
