Tura, Dec 3: Persons with Disabilities (PwD) ba be•enni gita cholgri ong•gipa manderangni salko Bristibar salo South West Garo Hills a•jani Zikzak multi facility centre-o maniangaha aro ia salko manianio South West Garo Hills a•jani Deputy Commissioner Ramakrishna Chitturi jinmana aganprakengon, be•enni gita cholgri ong•gipa manderangna miksonge sorkarini ra•gatgipa scheme-rangko district administration-ni gita sokate on•na jotton ka•gen ine ku•rachakaniko on•angaha.
Ia salko manianio songni ja•delgipa manderang, ma•a paarang aro be•enni gita cholgri ong•gipa bang•bea manderangba dongpae bakko ra•angaha.
National Disability Pension Scheme-ni bidingo tom•bagiparangna agan-talate on•angengon, ian be•enni gita cholgri ong•gipa manderangna sorkarini ra•gatgimin pension scheme ong•ani gimin ia scheme-ko man•na nanggipa manderangona sokatna gita district administration kamko ka•gen ine Chitturi parakataha.
Sorkarini ong•atenggipa program-rango bak ra•jringe an•tangtangna janggi tangani cholrangko sandie ra•china gitaba ua tom•anio bak ra•giparangko didiangaha.
An•tangtangni neng•nikanirangko namatna man•na gita pangnan district administration-na u•iatchina gitaba SWGH a•jani Deputy Commissioner, a•jao songdongenggipa manderangko didiangaha.
Ia program-ko ong•atanio dongpae jinmana aganprakanggipa gipin manderangara, Zikzak PHC-ni Medical & Health Officer Dr Arundhati Hajong, Ampati-ni District Social Welfare Supervisor Jakchina Sangma aro gipinrang ong•a.
