New Delhi, Dec 20: West Bengal a·dokni manderang, Mamata Banerjee-ni kamo kusi ong·tokjaenga aro dingtanganiko nangniktokengaha ine Robibar salni bako Union Home Minister Amit Shah parakataha. Birbhum a·jani Bolpur jolo roadshow ba ramao mesokaniko ong·atengmiting somoio Shah, ia kattarangko aganaha.

“Iandakgipa roadshow-ko anga angni janggi tanganio changsaba nika dongkuja. Ian Bengal a·doko songdongenggipa manderangni Prime Minister Narendra Modi-na ka·saaniko aro uo ka·donganiko mesokani ong·enga. Bengalni manderang dingtanganiko nangniktokenga,” ine Shah aganaha.

Ia roadshow-ko ong·atanio bang·bea manderangni bak ra·aniara Mamata Banerjee-ni kosako suk ong·nikgijaniko mesokani ong·enga ineba ua aganaha.

Ia roadshow-ko Bharatiya Janata Party (BJP)-ni dilgiparang 2021 bilsini Assembly election-na ‘bil mesokani’ ine mingahachim aro ia roadshow-ko Robibar salni 3:10 bajimango Dakbungalow kal·chakramoni a·bachengate Bolpur Chowrasta More-o matchotataha.

“Bengal a·doko political-ni gita dinggrikaniko, tangka jakkalsretaniko aro Bangladesh a·songoni niam gri napsrukanirangko bon·atna gita manderang dingtanganiko nangniktokenga,” ine Union Home Minister aganaha.

Ia roadshow-ko ong·atanio Amit Shah, West Bengal-ni BJP president Dilip Ghosh baksa re·jome, manderangko salam ka·angaha.

Uamangni re·jomengmiting somoio ritchani ritcha manderang, ramani samtangtangon home minister-na kusi ong·e chrik a·bokanirangko dakriktokaha.

Union Home Minister, salgnina West Bengal a·dokona re·angahachim aro iana skang ua Robibar salni bakon, Bengal-ni folk singer ‘Baul’-ni nokonaba re·ange misalko cha·eaha.

Sonibar salo ua, West Bengal a·dokni Paschim Medinipur a·jao donggipa game ge·e cha·gipa mandeni nokona re·angskae misalko cha·eskaahachim.

Re·baenggipa 2021 bilsini April-May jani gisepo Bengal a·dokni Assembly election-ko ong·atna siengani gimin Shah, Bengal a·dokona re·angaha.