Shillong, June 7: A·doko bijoliko bikotenggipa Shillong-o chi dim·changgipa Barapani ba Umiam-oni chi namen komiaha aro bijoli bikotaniko bon ka·aona sokna gitik dakpile chi rokangengahani a·selo re·baenggipa salrangode da·ona baten Meghalaya a·doko songdongenggiparang bijolina neng·nikaniko chagrongangnaba donga ine a·dokni skotong minister Pa Conrad K Sangma, Butbar salo aganangaha.
Baditaba jaarangonin a·doko mikka-bitchirangko chu·onga gita man·jaengani a·selsa da·alo a·dokni manderang bijolina neng·nikanirangko chagrongna gita nangtokenga ine aganangengon, re·bagnigipa salrango mikkarang chu·onge wahaosa bijoliko name aro chu·onge watpiltaina gita man·aignok aro iara an·chingosan mangmang ong·aija, gipin a·dokrangoba apsandakgipa obostakon chagrongenga ine skotong minister parakataha.
A·doko da·omiting bijoli kimitengani somoiko baridapatana gita sorkari man·adipet jotton ka·enga, indiba re·baenggipa sal 100 rangna kingking obostarang da·o gita ong·angkuaiode bijoliko brena gita sorkari, gong kror 300-rangko koros ka·dapna nangnaba donga ine Pa Sangma aganangkuaha.
Bijoliko ching·ate rakkina gita bijoli breaniko man·chape, minggipin dakgipa kororsrangna batanggimin bilsi-gnirango sorkari, a·dokni kajinaoniko gong kror 600 mangni gita tangkarangko jakkalenga ineba skotong minister agan-talatangaha.
