Shillong, March 23: A·doko bijoliko watani a·bao simsakgija kamrangko ka·ata ine matnangenba Power minister Pa James Pangsang K Sangma-ko kam ra·galchina dabianganina UDP-ni General secretary Pa Jemino Mawthoh-ko matnangdoatskaengon, Power minister-ni dilanichi bijolina da·omiting akkal-karap ong·e chagrongenggipa neng·nikanirangko amadipet namatna jotton ka·e sorkarini kamrangko ka·atenganiko ma·siengoba Pa Mawthoh, jean da·alona kingking politics-ni pilak kamrango ku·gri gita dongbahaoba an·tangni man·gnina da·osa cholko ra·e rang·san nadobaenba ong·gija kattarangchi matnangna cholko ra·skaenga ine NPP Youth Wing, Mongolbar salo matnangaha.
Kamrangko simsakgija ka·eming a·doko bijolirangko sirekrekataona sokatenga ine matnangenba adita salna skang a·joltangni political dol United Democratic Party (UDP), Power Minister Pa James K Sangma-ko kamoniko ra·galchina gita dabiahachim.
Iani bidingo aganangkuengon, “A·doko bijoli watanirangko kimitna nanganio neng·nikanirangko man·adipet namatna gita Pa James Sangma aro CMD iamangni agangrikanirangko daktaitaiani a·selsa NEEPCO, a·bachenggipao bijoli kimitaniko ra·galpilna namnike tik ka·ona sokaha, ine NPP Youth Wing-ni padot Nicky Nongkhlaw agandapataha.
UDP-ni a·gipi dilgipako matnangdapanio, “Tosusae niatode Pa Mawthoh-ni ning·o, da·o ong·enggipa obostarangko niroke kamko ka·atna gitamangba MeECL-o darang dilgipa gri ong·sranggenchim aro da·o neng·nikenggipa obostako batesa namsranggijaona sokatgenchim ineba Nongkhlaw matnangkuaha.
Politicalo man·gnina re·baenggipa 2023 bilsini eleksinna skang ia mamlako politics kal·ani gimin Pa Jemino Mawthoh-ni kosako matnanganirangko ra·bakuenba, eleksinrang sepangrorobaengahani gimin an·tangna namgni cholko nikate Pa Mawthoh, Sombar saloni rang·san chanchigitikesa indakgipa matnanganirangko ra·bana jotton ka·angskaaha ineba NPP Youth Wing-ni dilgipa parakangkuaha.
