Shillong, March 9: Meghalaya a•doko a•bachengatgipa dingtang dingtang project-rangko mikkang bilsio chu•gimik matchotna man•jagenchimoba kamrangoni 90 percent-kode matchotatna man•gen ine Sombar salo, Meghalaya a•dokni Chief Minister Conrad K Sangma parakataha.
Bilsi gittamna sorkari chalaina man•aniko gisik ra•na gita ‘Meghalaya On The Move’ ine segimin lekkao, MDA sorkarini a•bachengatgipa dingtang dingtang kamrangni gimin a•dokni Chief Minister, janapataha.
Cabinet tom•a matchotani ja•mano kobor ra•timgiparangna aganprakatengon, “Chinga a•doko nangchongmotgipa kamrangoni mitamko a•bachengmanaha aro chingni a•bachengatgipa pilak project-rang da•o chu•sokbaengahani gimin ia bilside chingna namen mongsonggipa ong•gen,” ine Chief Minister parakataha.
MDA sorkarini chu•sokatgipa dingtang dingtang kamrangko see Sombar salo dingtangmancha lekkako oprakatahachim.
A•dokni dingtang dingtang biaprango a•bachengatgipa kamrangko nipiltaina ia bilsi mongsonggipa ong•gen ine janapatengon, “Uan songsalni namgnina, game ge•e cha•enggiparangni namgnina, bading chiwale cha•enggipa chadamberangni namgnina, a•doko nokrik nokdakani ba gipin dal•dalgipa scheme-rang ong•genchimoba ia bilsian chingna ia kamrangko nipiltaiani somoi ong•enga aro iano pangchake chinga chingni kamrangko namdapatna nanggen,” ine Chief Minister parakataha.
Tura, Shillong aro Jowai jillarangko nitobatatani bidingo ia lekkao MDA sorkari janapjaha maina ia kamrangko da•osa a•bachengatna siengaha ineba Chief Minister, bilsi gittamni gisepo sorkarini chu•sokatgipa kamrangni gimin segimin lekkani bidingo parakataha.
“Toe aganna gita, Tura jillako nitobatatna work order-ko chinga tarimanaha. Mikkang jaode chinga Jowai-naba work order-ko tarignok aro Shillong-nade chinga minggittam ba mingbri dal•dalgipa project-rangkon chanchie donmanaha,” ine Chief Minister aganaha.
