Shillong, Feb 1: Batanggimin bilsi 45-rango a·doko mamingni gitan namroro-silroroani dongjaha ine a·dokni skotong minister Pa Conrad K Sangma-ni a·kangenggipa kattako jegalatenba, ua apsan bilsini gisepo uni pagipa sagi Purno Sangma-ba ma·mongo dingtang dingtang gadango kamko ka·anggenchimoba a·doktangna maming namroro-silroroaniko ra·baa dongskaja ine AICC-ni media coordinator, Matthew Anthony aro Bobeeta Sharma -maang Butbar salo matnange aganangskaaha.
“Da·alo Pa Conrad Sangma-ni Meghalaya a·dokni skotong minister ong·enganiara aro a·dokni manderangna dangdike on·na gita cholko man·enganiara Meghalaya a·dokni manderangni nangnikanirangko chu·sokate on·china Congress dolni niksamsoe uamangna cholko on·ani a·selsa ong·a” ine Sharma parakataha.
Indake ong·genchimoba, Megahalaya-ni manderangna dangdike on·na chol ong·enganiko skotong minister dilsretskaenga aro batesa MDA-ni pilak memborrang baksa manderangko cha·bokenga ine Congress dol nikatskaenga ineba Sharma matnange aganangkuaha.
Batanggimin salo a·doko gital assembly nokko rikatenggipao kam tik ong·jani a·sel protchong be·gruanio jak donggipa engineer-na NPP tikitko on·aniko jegalatengon, uandakgipa mandeko sasti on·ani pal batesa MDA sorkarini una ianpakni eleksino susana party ticket on·skaenganiko niatgenchimode cha·bokgipa manderang baksa aro cha·bokanina jak on·paenganiko an·ching nikatna man·enga ineba Sharma agandapataha.
Congress dolko wate katenba skango a·dokni skotong minister ong·anggipa Dr Mukul Sangma-ni TMC dolo napna tik ka·aniara dal·bea gualani ong·aha ine AICC-ni dilgiparang aganangskaengon, TMC-ko Meghalaya a·doko a·palchini inesa u·itokani gimin manderang maming dakeba ra·chakjawa aro eleksinoba chu·sokjawa ine aganatenba, BJP dolko a·paloni ine chana gitan apsandake TMC-ko a·dokni manderang chanengani gimin Dr Mukul, iandakgipa dolo napange an·tangni gamchatgipa bilrangko indinsa gimaatenga ine Sharma matnangangkuaha.
