Shillong, Apr 3:1972 bilsio Meghalaya a·dokko man·chengaonin Assam a·dok baksa nangchapgipa simarango so·sojengjeng ong·anirangko namatchipna man·jahani a·sel ia jolrango songdongenggipa manderang maming namroro silroroanirangko man·jaha aro uandaken bi·sarangba skul nokrang dongjani a·sel bol salakkimrangosa skie ra·na nangtokaha. Ia meligrikna man·jaenggipa biaprango tom·tomaniko ra·bana a·dok damgnini sorkarirang ja·kurangko de·chakataha aro uandaken da·o a·dok damgnini simarango meligrikna man·jaenggipa dam 12 biaprangoni damdokkode namatna man·aha.
Ia sima jolrango indita bilsirangna bi·sarang skul nokgri a·gilsakni seng·aniko skie ra·na nangahaoba da·o iandakgipa biap damsao skul nokrangko rikengaha ine Bristibar salo, Meghalaya a·dokni Chief Minister Conrad K Sangma, Ri Bhoi a·jani Purduwa Kharpati-o All Meghalaya Karbi Association (AMKA)-ni bilsi 50 gapaniko manianio parakataha.
“A·dok damgnini gisepo meligrikna man·jaenggipa biap damsa donga, jeon skul nokrang dongja aro ia songni bi·sarang, a·palrango, basakoba saniba nokrango aro basakobade bol salakkimrangosa poraina gita nanga. Ia sima jolo a·dok damgni meligrikna man·jani a·sel batanggimin bilsi 52-na skul nokrang dongchipkujachim. Indiba Karbi Anglong Autonomous Council (KAAC)-ni CEM aro Assam sorkarina phone ka·atani ja·man ia biapo Meghalaya Chief Minister’s Special Development Fund (CMSDF)-ni dakchakanichi skul nokko rikna songgigrikaha,” ine Sangma aganaha.
Indita bilsirangna skul nokgri a·gilsakni seng·aniko skie ra·na nanggipa bi·sarang da·o skul nokrangko man·gnok aro ia skul nokrangko rikna a·bachengengaha ineba Chief Minister aganaha.
A·dok damgnini simarango so·sojengjeng ong·anirangko namatna kam ka·anio ra·bianirang bang·en dongkuenga indiba a·dok damgnini sorkarirang ia neng·nikaniko namatna kang·kare kaaha ineba Sangma aganaha.
A·dok damgnini simarango meligrikanirangko namatna kam ka·engani gimin Assam-ni Chief Minister Himanta Biswa Sarma-ko mittelpilangengon, a·dok damgnini simarango meligrikgijaniko namataniara altua kam ong·ja aro batanggimin sorkarirang iako namatna jotton ka·e nijahaoba da·alo ia sorkari, ia meligrikgijaniko namatna jako ra·aha ine Sangma aganaha.
Meghalaya a·doko Karbirangko ‘Mikir’ ine gadang donaniko dingtangatchina AMKA-ni dabienggipani gimin aganchakaniko on·angengon, iani bidingo a·dok sorkari, dingtangmancha Social Welfare department-ni commissioner secretary-ni dilanichi committee-ko songaha aro ia committee-sa am·sandianirangko dakenba India sorkariona ra·anggen ine Chief Minister parakataha.
Na·simang ia video-koba nina man·gen:
Na·simang iakoba poraina man·gen: Ri Bhoi a•jao Karbi Cultural Centre-ko rikna lak 50-ko on•gen: Conrad
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
