Nongpoh, Sept 24: Bilsi 53 ong•gipa Lakyntiew Syiemlieh, Bachelor’s of Arts (BA) Degree-ko matchotanichi, bilsiara chanani number-san ong•aia ine sakki on•an baksa sakgipinrangna didiani aro janggi tanganio gisik ra•gnigipa chu•sokaniko man•aha. Uni indake mangsonga gnang rake aro krenge kam ka•anian, je bilsioba mangsongatango chu•sokgipa ong•na man•aia ine gisik ra•ataniba ong•aha.
Follow NE Hub News with just a Click on Whatsapp; Direct Link here
Umsning Lum-Umpih-o songdonggipa Lakyntiew, saksa ma•gipasan ong•aigija Ri Bhoi a•jani Umsning-o donggipa Persara Upper Primary School-o skigipani kamko ka•enggipa ong•achim. Ua poraidapna ine an•tangko on•kange Umsning-ni Balawan College-o bimung segatenba ia bilsio graduate ong•aniara aiao inmanpilani ong•aha.
Poraia skianiko dakania chadamberangnasan ine chanchisretaniko dingtangatna gita aro poraia skianiko bilsirangchi maming dakeba champengani dongja ine Lakyntiew Syiemlieh-an saksa dakmesokgipaba ong•aha.
Uni indake chu•sokgipa ong•aniko nike, Khasi Students Union (KSU) North Khasi Hills a•jani Education Cell-ni gita, chana amsokpilgija chadamberang aro brigimin dolgni manderangnan didianiko on•ahanina aro u•ianiko skie ra•anio aro chu•sokgni ramao bilsio pangchake champengani dongja ine sakkiko on•ahanina, mittelpilskaaniko dakangaha.
