Williamnagar, Oct 15: October 8 tariko bilsi 83 onggipa Jesuit Social Activist Father Stan Lourdusamy jekon manderang Fr. Stan Swamy ine masibata, Maoist aro gipin champenggimin bobil dolrang baksa jak donga ine National Investigation Agency sing’sandianiko dakna rim’aha.
Batanggimin bilsi 2018 January 1 tarikni Bhima Koregaon-ni mamla, jeon Bhima Koregaon-o dakgrikani bilsi 200 gapaniko maniani ong’ahachim. Ua maniani somoio kaji golmal ong’e bang’an mata bua man’aha aro saksade janggi mangkimaatako man’ahachim. Mongsongbate uano nanggrikania Dalit-rang aro Maratha-ni chu’a gadangni manderang baksa ong’aha aro Fr. Stan ia pilako jak dongpa’a ingipa National Investigation Agency uko rimaha.
Uko rim’na salgni skang uni video gita janapatani gita, National Investigation Agency konta 15-na chongmotan July 27, 28, 29, 30 aro August 6 tarikrango sing’rikianikoba dakaha aro uamang angko galona angni computer-o tole taridape donaha aro uan angni ong’chongmotja aro Agency angko Maoist rang baksa nangrimgrikani donga ine ku’chakdraatnasa jotton ka’enga ineba ua agandapaha.
Indake ongengon, Williamnagar-o Fr. Stan-ko niamni a’palo rim’anina jegalaniko dakna tom’bimonganio Loyola College-ni Principal Fr. Sunny Augustine tom’bagiparangna rimchaksoani kattarangko aganchengan baksa Fr. Stan-ko niamni a’palo rim’ani bidingo kan’dike talatchengaha.
Ia tom’aniona dingtang dingtang gadang-o kam ka’gipa aro dingtang dingtang toromni manderangba re’bae bakko ra’angaha. Indake ua tom’anio bakko ra’nagita Garo Hills Catholic Union-ni Padot aro Northeast Legal Fraternity-ni Padot Pa Challang Artiust Ch Marak-ba bako ra’aha aro ua Fr. ko tol’e rim’aniko raken jegale aganaha. District Multipurpose Socio Economic Development Organisation-ni Chairperson Pa Krosnil D Sangma jean saksa A’chikrangoni lekka serakgipa ong’achim uaba tom’anio bakko ra’angaha aro ua banga.
India-o tribal rangko indake onchepanirangko parakan baksa Fr. Stan ko tol’e rimaniko raken jegalaha. Ia tomanio Bolkinggre Baptist Church ni pamong Pa Traister D. Shira ba bakko ra’angaha aro ia somoio pilak Christianrang je ma’malniba ong’china apsan kumonge Fr. ko indake ongija dake rim’aniko jegalan baksa uko watpilchina kamkana nanga ine parakaha. Ia tom’anio banga manderangan bak ra’angaha aro bonchotao jilma ni nangrimaniko mesoknagita mombatirangko soe jrip donge Isolo bie matchotataha.
