Shillong, Aug 15: A·songni jakgitelani bilsi chang 77-gipako a·dokni skotong Shillong-o maniangengon, a·dokni skotong minister Pa Conrad K Sangma, re·baenggipa bilsi bongarango a·doko songdongenggiparangni namgnina sorkarini niksamsoe kam ka·enganirangko janapangenba, ming 10 ku·rachakanirangko a·dokni manderangna on·angaha, jeon lak 5 manderangna kam on·ani cholrangko ong·katatan baksa pilakni gitan silroro-namrorogipa ba niksengbatgipa Meghalaya a·dokko ong·atna uni nikjumanganiko chu·sokatna gitaba ku·rachakaniko on·angaha.
Ia 2023 bilsioni re·baenggipa 2028 bilsiara chirangko chimongchakani somoi gita chacha ong·a ine aganangengon, re·baenggipa bilsi -bongarango manderangni namgnina aro songsalo janggi tangani gadangko namdapatna gita sorkarini kamrangko ka·na mangsonganirangchi ia mingchikking ku·rachakanirangko chu·sokatna man·gen ine Pa Sangma parakataha.
Pa Sangma-ni ming 10 ku·rachakanggiparangoniara, rama-jal·langrangko tarie on·na, nokantina chi pipeko sale on·na, kona-noksik gipe bijoliko sringe on·na, songantichina internet-ni bilrangko sokatna, sorkarini dakchakako man·na kragipa nokdangrangna nokrangko rike on·na, bi·sa sakantina sorkarini gita nirok-simsakani cholko on·na, pilakni an·seng-baljokanina nambata sana-bananiko on·na aro lekka-porao nambatgipa skie ra·ani cholko on·na, pilak gadango kal·susaanirangko namdapatna aro chadamberangna mongsong nangchongmotgipa kamrango dakchakanirangko on·na ong·a.
“Ia ku·rachakanirangko be·en pil·atna gita, India sorkari, Multilateral funding agency-rang, songni-nokni manderang, NGO-rang, aro media-rangko man·chape, Meghalaya a·dokko namroro-silroroatna gisiko nanggiparang aro bakrimgiparang baksa nangrime nanga gita kamrangko ka·atenga ine Pa Sangma, Polo-o a·songni nisanko songdoangenba tom·bagiparangna agnanprakatan baksa, da·ororo a·gilsako ong·baenggipa obostarangni gimin mikraksamsoe dongchina gita a·dokni manderangko didiangenba, a·doko songdongenggiparangni mikkanchini gimin uni sorkari on·kange kamrangko ka·atenga aro a·dokni GDP-ko dunagni ong·atna, aro lak 5 manderangna kam on·na gita je cholchiba uni sorkari jotton ka·gen ine skotong minister parakangaha.
India sorkarini programrang aro gipin on·dapgipa project-rangko a·doko ra·gatanirangko sorkari bilakdapatgen ine Pa Sangma aganangkuengon, “a·dokni programrang jekai FOCUS, PRIME, YESS Meghalaya, MOTHER, PROGRESS, aro Home Stay Scheme-rangkoba chinga apalbatatgen aro gitalgipa program CM-ELEVATE-chi chonchona bading-chiwalgiparangna aro chadamberangni janggi tanganina namgniko ra·badapgen ineba skotong minister parakatan baksa, re·baenggipa bilsi -bongarango, Farmer cooperative-rang uamangni game-ge·e man·gipa bolam-biterangko a·songni gipin bakrangchi aro a·songni a·palrangchi watatjringna man·gnigipa Meghalaya a·dokko MDA-II sorkari rikanggen ineba Pa Conrad Sangma parakatjolaha.
Watch
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
