Bangsi Apal, Jan 2: Kristianrangni Krismas aro Bilsi Gital manianiko matchotatna gita Sombar salo, dingtang dingtang biaprangoni sak 15,000-na baten, North Garo Hills a•jani Bangsi Apal songo ong•atanggipa Songkritan chrokanio bakko ra•angtokaha.
Bilsiantian ia Songkritan chrokaniko ia apsan biapon January-ni 2 tariko ong•atrongenga aro ian da•o Garo Hills-o Songkritan chrokanio dal•batsranggipa chrokaniba ong•engahachim.
Chengonin A•chik a•songo ia Songkritanko, Krismas sokna skangan songtangtango dakrongbaengachim aro da•o ia git ring•mittele chrokani A•chikrangni gisepo gimaroroengahaoba, ia dakrongbewalko ripinge rakkina gita batanggimin bilsirangonin Bangsi Apal songo ong•ate ia chrokanio Garo Hills gimikonin re•bae bakko ra•tokengahachim.
Ia Songkritan chrokanio butchuma budepa, me•apa me•chikma, pante me•tra aro bi•sa desarangba bakko ra•ronga aro ia chrokaniko Bangsi Apal songo ong•atanioba chansokpilgijagipa dal•a chona pilakan re•bae bakko ra•angrongenga.
Bilsianti ia Songkritan chrokaniko Bangsi Apal songo ong•atenggipa dolni dilgiparangoni saksa JG Momin-ni kobor ra•timgiparangna parakatani gitade, Bangsi Apal songara Assam aro Meghalaya a•dokni simao donggipa song ong•ani gimin a•dok damgnionin A•chikrang re•bae bakko ra•epana gita cholrangko man•enga aro ia chrokaniko uamang A•chik Kristianrangni dakbewal rikbewalko tange rakkiangkuna miksonganio bilsiantian ia apsan biapo ong•atenga.
Ia changba Songkritan chrokaniko Bangsi Apal songo ong•atanio, ia sima jolrango donggipa dam 20 songrangna baten bakko ra•angtokaha aro ia songrangonisan ong•aigija Garo Hills gimikonin bang•bea manderang re•bae bakko ra•angtokaha ine Dainadubi songni saksa GD Shira parakatskaaha.
