Jowai, Nov 15: Atchidaldaloni bilsi 5 ong•gipa bi•sarangni Pneumonia ba gusu sordi dake saaniko warachakna aro manderangna mikrakataniko on•na gita Sombar attamo, ‘The Social Awareness and Action to Neutralise Pneumonia Successfully (SAANS) campaign-ko West Jaintia Hills a•jao, Jowai-ni MLA Wailadmiki Shylla-ni jakchi a•bachengate on•angaha.
Ia program-ko West Jaintia Hills a•jani District Medical & Health Office-ni gita ong•atangaha aro ia tom•anio West Jaintia Hills a•jani Deputy Commissioner BS Sohliya, Additional Deputy Commissioner MA Challam aro DM&HO-ni medical officer-rangba bakko ra•angtokaha.
Ia SAANS campaign-ko a•bachengatanio Jowai-ni MLA, jinmana aganprakengon, ia program-ko ong•atna gita rakbee kamrangko ka•ahani gimin doctor-rangko Health department-ko mittelpilangenba, atchiaonin bi•sarangko an•seng baljokgiparang ong•atna man•na gita iandakgipa program-rangara ma•giparangna namen nangchongmotgipa ong•a ine parakataha.
Manderangni an•seng baljokanina sorkarini on•enggipa dingtang dingtang namgnirangko ra•china gita jolo songdongenggipa manderangko didiangengon, mikkangchiba manderangni namgnina iandakgipa an•seng baljokani program-rangko ong•atangkuchina ua, Health department-ko didiangaha.
Ia SAANS campaign-ko ong•atani bidingo West Jaintia Hills a•jani District MCH Officer Dr Helen J Uriah talataniko on•angskaengon, ia program-ko November 12 tarikoni a•bachengataha aro re•baenggipa 2023 bilsini February 28 tarikona ong•atanggen ine parakataha.
