Shillong, Feb 17: An·tangtangni bil-sasonko jako ra·enggipa a·jakon name nirokna man·chenggija gipin political dolrangni kosako matnange agananganina, Jirang constituency-ni Meghalaya Trinamool Congress (TMC)-ni candidate Sunmoon Marak, Sukrobar salo BJP-chi sason ka·enggipa Assam a·dokon Bangladesh-oni niam gri napdrabae songdonggiparang bang·preten gnang ine aganangskaaha.
Mija Bristibar salo, BJP dolni candidate Riya Sangma, TMC dol a·doko bil-sasonko jako ra·a ong·ode Meghalaya gimikon Bangladesh-chini napdrabae songdonggipararasa gapaignok ine TMC-ni kosako matnange aganangahachim ine nikatna gita man·gen.
TMC-ko Bangladesh-chini napdrabagiparangko a·dokona rimgombagen ine tol·e matnangna skang, BJP-chi sason ka·enggipa Assam a·dokon Bangladesh-chini niam gri napdrabagiparang bang·en dongakode uamang nikatjaengama? ine Marak sing·doangaha.
Salgro-salaram a·jolo ra·chakna jechakenggipa aro ka·namgijagipa Citizenship Amendment Act (CAA)-ni gimin aganangskaengon, songsul a·song damdokoni sinjetanirangko man·gipa bang·pagija jatrangna India a·songo songdongkamna biapko on·na gita ia Bill-ko ra·bagipaba BJP-sa ong·a ine aganenba, NPP-ba ia apsan bill-ko namnikpae jinma vote on·tokaha, indiba Trinamool Congress iako raken jegalsoskaaha ineba TMC-ni candidate Sunmoon Marak matnange agandapataha.
