Guwahati, June 18: A·doko sasonni bilko jako ra·enggipa Bharatiya Janata Party (BJP) dolo napangna am·aniko knasringani gimin, gimik chang-brina kingking MLA ong·bagipa aro dolni saksa gamchatgipa Pa Rupjyoti Kurmi-ko mija Sukrobar salo Congress dolni membor ong·aoniko ra·galaha.
Assam Congress-ni padot Pa Ripun Bora-ni jakchi soi ka·e u·iatanggipao, Kurmi-ko doltangni kosako chakate dakani kamrangna Indian National Congress-ni Primary Membership ong·aoniko bakbakan ra·gala ine janapataha.
Indake ong·engon, Pa Kurmi-ba ma·mongo aro a·doko Congress dolni chalaianirangko suk ong·nikgijaniko janapenba Assam Assembly-ni membor-oniko kam watangaha. Ua, batanggimin chango 126 Member Assam Assembly-o susae cha bagano kamko ka·gipa jatni bang·bata vote-rangko man·e Congress doloni chegipaba ong·achim.
Uni aganani gita, “Ma·mongo, Te Rahul Gandhi-ni chubata gadango donge kamko ka·anichi Congress dol chu·sokjaha, indiba Ma Sonia Gandhi-ni jako ra·engmitingo Congress chegipa ong·achim ine aganenba, gimikchinikon bang·en chakanirangko man·e Assam Assembly eleksinoba chingni dol chena gita namgipa chol dongachim, indiba ma·mongo aro a·doko, AIUDF (All India United Democratic Front) dol baksa bakrimna tik ka·e dal·a gualani ong·jok,” ine Pa Kurmi agandapataha.
Dolni ja·pangoni u·iatani gitade, Pa Kurmi mija Mongolbar walo BJP dolni dilgiparang baksa agan-golpogrikna, Upper Assam, Jorhat district-ni Mariani-oni Guwahati-ona chu·gimik 335 km-mang namen chel·begipa ramako songreangaha. Baditaba salrangonin ua, uni constituency-oni BJP dilgiparangko grongaha aro BJP-ni minister Pa Pijush Hazarika-koba grongangaha,” ineba janapataha.
Uni BJP dolona jitbana am·aniko ma·sisoe, dolni saksa gamchatgipa Jagiroad-ni state Minister aro Assam-ni skotong minister Pa Minister Himanta Biswa Sarma baksa melibegipa Pa Pijush Hazarika, “je dolo napangoba ua (Kurmi) dolna namen jakkaltogipa ong·gen ine aganangaha.
Iana skangba, Congress doloni uni ong·katna am·ani gimin koborrang jangbingbangaha, indiba ia kattarangko jee, “anga Congress dolon dongaigen maina angni sianggipa ma·gipa jumango angko doltangon dongaichina aganaha ine Pa Kurmi talatangskaahachim.
