Shillong, May 01: Party-ni president-na eleksinko ong·atchina gita Pynthorumkhrah-ni BJP MLA aro a·dokni minister Pa AL Hek-ni dabienggipani bidingo, ma·mong BJP-ni padot Pa JP Nadda-ni kam ka·ani somoiko June 2024 ona ra·doatahani gimin da·odipetde party-ni eleksinko ong·atna gita man·kujawa ine Meghalaya BJP-ni padot Pa Ernest Mawrie, Sombar salo talataniko on·angaha.
Party-ni eleksinko ong·atchina MLA Pa Hek-ni agananganiara uni an·tangni gitasa ong·aia ine aganenba, state party president-ni dangdike on·ani somoiara bilsi-gni ong·ja, bilsi-gittamsa ine Pa Mawrie agandapataha.
“Angni padot ong·e dangdike on·ani somoi bon·aha, indiba ia bilsio National Executive Committee, Delhi-o tom·e chanchirimangani ja·man Pa JP Nadda-ni kamko 2024 bilsini June 24 tarikona ra·doatna tik ka·aniko Defence Minister Pa Rajnath Singh parakataha ine janapatan baksa, national president-na eleksinko ong·atna gita ma·mongoni parakatkuja dipetde, chinga eleksinko ong·atna man·kujawa, aro iani bidingo Pa Hek-ni agangipa kattarangara ong·ja ine Pa Mawrie aganangskaaha.
Batanggimin 2003 bilsioni 2006 bilsiona Pa Hek-ba party-ni padot ong·e bilsi-gittamnasa kamko ka·angaha, bilsi-gni ong·ja ineba ua gisik ra·atangjolaha.
TMC aro BJP dolgni nangrimani bidingo agan-golporimna gita TMC-ni dilgiparang uko grongenga ine Pa Hek-ni a·kangenggipana, iani gimin Meghalaya BJP mamingkoba knaa dongkuja aro TMC-ni MLA-rang ching baksa bakrima ba bakrimgijani giminde chinga u·ija, haida Pa Hek baksa agangrikengnaba donga indiba chingni dolni gitade mamingkoba u·isokuja ineba Pa Mawrie talatangaha.
Meghalaya BJP-o dilgiparangni gisepo maini gimin meligrikgijanirang ong·enga ine sing·anina, Pa Mawrie ia a·kanganiko jegalange, dolo maming meligijanirang dongja, aro gisiko sike darangni agananirangkode uamang beng·na man·ja, indiba bang·gija salni gisepon dolni kosako skatang koborni manderangna aganna man·gijaniko dolni gita uamang u·iatanggen ine BJP-ni padot agandapataha.
