Srinagar, Oct 28: Re·anggipa Butbar salo Jammu & Kashmir police baksana Indian Army nangrime Maramulla district-ni Washran songo bobil dolrangni kosako am·sandiataniko dakmitingo bobil dolni jakchi goa man·ani ja·man a·songna janggitangko on·chake sianggipa Rifleman Kulbushan Manta-ko, pilak gadangrango a·songna dangdike on·enggiparangni pal ong·e GOC Chinar Corps-ni Lt Gen ADS Aujla, Sukrobar salo dingtangmancha mande ra·aniko dakangaha.
Sianggipa Rifleman Kulbushan Manta, unsalo bobil dolrangko warachakmitingo gulli nanga man·e bilongbee jokkom ong·aha aro bakan uko Srinagar-oni 92 Base Hospital-ona adasuo gate rimangahachim, indiba saknaa sitengtoe mija Bristibar attamchibara 12 atamango janggi galaiaha.
Bilsi 27 san ong·kuenggipa sianggipa Rifleman Kulbushan Manta-ara batanggimin 2014 bilsio Indian Army-o napangahachim. Uni manggisiko uni songtang Himachal Pradesh, Shimla-ni Gaunth-ona ra·angaha, jeon uko sipairangni dakbewal gita mande ra·aniko dakatani ja·man bon·kame jringjrotna neng·takatgen.
