Boko, Feb 24: Re·anggipa walo Boko sepango gari a·sel ong·anio MeECLni engineer Chonmei Rani T Sangma saknabeaniko man·e da·sipring do·gisikon a·gilsakko watangaha.
Sianggipa engineer aro uni segipa mejal attamo Guwahationi Turaona Honda VRV gario re·baengachim. Unon attam 9:30 bajimango, Boko-ni Shiv Mandir sambaona sokon, uamangni gari ramao neng·take dongenggipa truck gario su·kropeaha.
Engineer skoo saknabeaniko man·aha.
Uamangko ta·raken Boko PHC-ona ra·angaha. Saknaa bilongahani gimin Chonmei Raniko Guwahatini Critical Care Hospitalona ra·angkue sanengachim. Indiba uni mata-bua man·ania namatpilani nalsao ong·ahani gimin ua pring 3:45 bajimangon janggi galaha.
Boko jolni soroko gari truck donao chagake sianggipa A·chikrang aditan ong·engaha, aro uamangoni bang·batan songsalo gadang chugiparang ong·tokachim ine nikatpilna man·a.
