Guwahati, May 14: Sukrobar salo, Tinsukia a•jani Tingrai bazar-o grenade bomako gopretanichi mande saksa so•otako man•e gipin sakgittam manderang bilongbee saknaanirangko man•na nangahani gimin boma gopretanio jak donggipa manderangko Assam-ni Chief Minister Himanta Biswa Sarma jegalataha.
Boma gopretanio jak donggipa manderangko rim•e rakgipa sastirangko on•china gitaba ua Assam-ni Director General of Police (DGP) Jyoti Mahanta-ko didiataha.
“Iandake kamrangara ka•pongni kamko mesokanisa ong•a aro iandakgipa kamko a•dok sorkari jrip nie dongjawa. Chanchininggija kamko ka•ani a•sel dosgri mande saksani janggi gimana nangaha,” ine Assam-ni Chief Minister parakataha.
A•sel ong•chakgipa biapona dariange, am•sandianirangko dakchina aro dos dakgipa manderangko ta•raken rim•china gitaba ua Assam-ni DGP-ko didiataha.
A•sel ong•anio sianggipa mandenaba ua an•tangni kalimpaaniko parakataha aro saknaanirangko man•gipa manderang ta•raken an•sengpilchina ine an•tangni namgipa skaniko parakataha.
Indake ong•engon, ia biapo grenade bomako gopretanio jak dongja ine ULFA(I) bobil dol a•kangatskaaha.
“Assam police-rang, manderangni nokrango bomarangko dape donenba chingkosa matnangna jotton ka•enga. Police-rangni kosako chingo nanga gita sakkirang donga,” ine ULFA(I) bobil dol parakataha.
