Shillong, Aug 14: Shillong songjinmao boma goprettaina siengani ine Intelligence-oniko kobor man·soani giminsa Meghalaya Police, ta·raken ja·kuko de·na nange, Hynniewtrep National Liberation Council (HNLC)-ni gitcham general secretary Cheristerfield Thangkhiew-ni nokko chadrapena nangaha ine Sonibar salo a·dokni Chief Minister Conrad K Sangma parakataha.
Iani bidingo kobor ra·timgiparangna talataniko on·angengon, boma goprettaina nanggenchimode manderangni janggirangna kenchakna nangani donga ine nikenba police-rang, maming a·sel ong·na skangan ja·kuko de·na nangaha ine Sangma parakataha.
Adita salrangna skang Shillong songjinmani Laitumkhrah-o aro una skang East Jaintia Hills a·jani Khliehriat-o IED bomako gopretanioba HNLC-ni gitcham general secretary Cheristerfield Thangkhiew-ni jak dongani sakkirangko police-rang man·soahachim ineba Chief Minister parakataha.
Ia biaprango boma gopretani bidingo ta·raken am·sandianirangko dakataha ine janapatengon, police-rangni kam ka·anio darangkoba saknaatna miksongani dongjachim indiba rasong grie ia a·sel ong·na nangaha ine Sangma parakataha.
“Uko rim·na man·ode nambatachim indiba angni agangimin gita rasong grie ia a·sel ong·na nangaha,” ine ua aganaha.
HNLC-ni gitcham general secretary Cheristerfield Thangkhiew-ni nokko chadrapeani ja·man East Khasi Hills a·jani Superintendent of Police (SP), National Human Rights Commission (NHRC)-na report-ko on·atmanaha ineba Chief Minister parakataha.
Ia a·selni bidingo magisterial inquiry-ko dakna gita sorkari kamko a·bachengengaha ine janapatengon, magisterial inquiry-ni report-ko man·ani ja·manosa ia a·selni bidingo judicial inquiry ba independent inquiry-ko dakna nanggenma nangjawa ukode NHRC nianggen ine Chief Minister parakataha.
Tom·tomaniko rakkiangkuchina gita a·doko songdongenggipa manderangko didiangengon, sorkari ba police-rang je kamko ka·genchimoba a·doko songdongenggipa manderangko naljoke rakkina gitasa ka·enga ine Sangma parakataha.
Bobil dol baksa agangrikani bidingo janapatengon, a·bachengonin sorkari tom·tomaniko rakkina gita bobil dake chakatenggipa dolrang baksa agangrikna kusi ong·enga ine Chief Minister parakataha.
“Bobil dake chakatgipa dolrang sorkari baksa agangrikna re·baengon, a·songni dongimin niamrango pangchakesa ong·na nanggen, so·sojengjeng ong·anirangko dontonchengna nanggen aro maming niamrang dongna gita nangjawa,” ine Sangma talataniko on·angskaaha.
Chief Minister-ni u·iatani gitade, 2021 bilsini January 16 tariko HNLC-ni chittiko man·soani ja·man Meghalaya sorkari, changgnina ma·mong sorkari baksa agangrikahachim.
“HNLC bobil dol tom·tomaona re·bapilna gita agangrikna sikenga ine aganeba dingtang dingtang biaprango so·sojengjeng ong·atani kamrangko ka·enga. Iako ma·mong sorkari maming dakeba ra·chakjawa,” ine Chief Minister aganaha.
