Guwahati, April 29: Bristibar pringchibara, saliram Assam-ni Bongaigaon a·jao donggipa Besimari jolo, bilongbee gogrikani ja·man police-rang, United Liberation Front of Asom-Independent (ULFA-I) bobil dolni dilgipa saksako goe galna gita man·aha.
So·otako man·gipa mandeara ULFA-I bobil dolni dilgipa Dwipen Saud ong·achim ine ja·mano police-rang ma·sina man·aha. Re·anggipa bilsini November jao ULFA-I bobil dolni gitcham deputy commander-in-chief Drishti Rajkhowa-ni an·tangko bame on·ani ja·man, sianggipa Dwipen Saud-ko ULFA-I dolni western command chief songskaahachim ine kobor on·aha.
Gogrikanio guli nangako man·ani ja·man Saud-ko Bongaigaon Civil Hospital-ona ra·angahachim indiba hospital-ona sokangon uko siaha ine doctor-rang parakataha.
Dolgni gogrikani ja·man police-rang, ULFA-I bobil dolni sakgipin Padum Rai minggipa mandekoba tange rim·na man·aha aro ULFA-I bobil dolni silchidare ponggni, grenade rongsa, gulirang aro mobile phone-rangkoba man·aha ine kobor on·aha.
Police-rangni u·iatani gitade, ia manderangni gimin kobor man·soa bakan police-rang, saksa Kishore Kumar Ray minggipa mandeni nokko chadrapeaha aro uandaken police-rang, bobil dolni manderang baksa pring 5:30 bajimangoni gogrikna a·bachengaha.
“ULFA western command-ni manderang, gipin bobil dolrang baksa nangrime, mande rim·gittangna miksonganirang dongenga ine chinga koborko man·soaha indiba uamang chu·sokgipa ong·jaha,” ine Assam-ni DGP Bhaskar Jyoti Mahanta, kobor ra·timgiparangna parakataha.
