Shillong, April 27: Khasi Students’ Union (KSU), West Jaintia Hills District Unit, Jowai-o donenggipa Border Security Force (BSF) sipairangko jitatani bidingo a·dokni dakchakgipa skotong minister aro Home-ko jako ra·enggipa Pa Prestone Tynsong-ko Bristibar salo grongangenba, BSF sipairangko, Jowai-oni Amlarem aro Mutapur Road -oniko jitatange Border area, chong·motan a·dokni sima-ari jolrango donatchina gita dabiangaha.

Minister-ko grongani ja·man union-ni General Secretary, Leningrad Tariang-ni kobor ra·timgiprangna agananganio, janapgimin ramarangko salanti re·ruraenggipa War Jaintia-ni manderangni union-na badi ka·doanirangko man·soani gita, cha·ani bostu aro salantio nanggipa minggipin bosturangko bajaroniko bree ra·angani somoio BSF sipairang pangnan rama tong·sao dongsoe garirangko neng·takatenba habi-jabi lekkarang jekai bostu brebaani cash memo ba ugita dakgiparangko sandirongenga aro aiao inmaniara, bajaroniko neng·e-dike gate ra·angenggipa bosturangko mangba uamang sandiatanirangko dakna gita garioniko ra·onchina ge·etronga jeni a·sel ua jolni manderangna bang·en neng·nikanirang ong·enga aro iarangko nirikkina gitade uamangni kam ong·jachim ine parakataha.

BSF sipairangni mongsongbatgipa kaman songadamo ong·gija sima-ari jolrango aro songoni chel·tangaosa nitimanirangko dakna nanggipa ong·a ine an·ching pilakan ma·sia, aro ua biaprango uamangni donganichi War Jaintia-ni manderangna aro salantio ua ramarangko re·ruraenggiparangna bang·en neng·nikanirang ong·enga ineba KSU-ni dilgipa agandapataha.

Iakoba poraie nina man·gen: M’laya CM aro Assembly Speaker-na mande ra·pilskaaniko daka