Guwahati, Oct 11: Pekatgipa sam ba drug-rangko niam gri badingsrukengani koborrangko man·sringe BSF aro Karimganj police nangrime sandirokataniko dakatenba Mongolbar pringwalo kg 9.477 mang ong·pilgipa pekgipa bosturangko Assam, Karimganj oniko seka baksana trak salgipakoba rim·aha ine koborna u·iataha.

Heroin minggipa pekatgipa sam ine chanchichipgipa bostuko Mizoram-oniko Karimganj gita Tripura-ona trak bolsao salbaenga ine ning·joljol koborko man·eming Mizoram aro Cachar Frontier BSF-ni 7 Battalion baksana Karimganj Police nangrime waljatchi 1 bajimango Karimganj Railway station sambajolni rama tong·sao trak bolsa (AS-11 BC-7975) ko dongdipate sandirikkitaton pekatgipa bostuko chipe ra·bagipa sabon case ge 764 ko man·aha jeni gamchatanian gong kror 47.4 mangni gita ong·achim.

Indake ong·engon, sekgimin bostu baksana trak salgipako da·o Karimganj police-ni jako niam gita sing·sandiataniko dakna pakwatataha ine koborna u·iataha.