Shillong, March 5: Sukrobar saloni dipet a·dokni Assembly-o tangka-paisa chamani bidingo (budget) tom·aniko a·bachengatani skanggipa salo a·gilsakko wate re·anggipa Mawryngkneng-ni MLA Pa David Nongrum sagi aro Rajabala-ni MLA Pa Azad Zaman sagimaangko a·dokni MLA-rang dingtangmancha mande ra·aniko dakangaha.
A·gilsakko watanggiparangni gimin kan·dike agananganio, Assembly-ni agan-chalaitimgipa Pa Metbah Lyngdoh, adita salna skang sianggipa Dr. Zaman sagini a·gilsakkko wate re·anganio uni bebera·na amgijaniko parakangaha. “Da·alonaba anga bebera·nan amkuja.
Ua saksa namen gamchatbegipa mande ong·achim ine aganenba, uni agananio sianggipa Pa David A. Nongrum sagikoba janapjole, ua saksa bilakgipa dilgipa ong·achim jean constituency-tangni manderang baksa namen sambabatgipaba mandeba ong·a ine Assembly-ni agan-chalaitimgipa parakataha.
A·dokni MLA sakgnini a·gilsakko wate re·anganina a·dokni skotong minister Pa Conrad Sangma-ba an·tangni duk ong·paaniko parakangaha.
“Pa Nongrum sagini a·gilsakko wate re·anganiko bang·an bebera·na amkujaenga. Bang·gija salrangna skang mangmangsan chinga unbaksanchim. Sasono ong·oba ba warachakgipa dolo ong·oba Pa David sakanti baksan namen melibegipa mande ong·achim ine aganenba, batanggimin bilsi 3-rango ia member sakgnian house-na bang·akon on·gilangaha ine skotong minister agandapataha.
Assam a·dokni skotong minister gitcham Pa Tarun Gogoi-ko dingtangmancha gisik ra·atjole agananganio, Pa Gogoi, chingni pagipa gita chachasa ong·achim. “Ua, dingtang ma·malni saksa politician ong·a jean pangnan namgipa dilgipa ong·ani kamrangko on·kange ka·ronggipaba ong·achim,” ine Pa Sangma aganaha.
House-ni gimik memborrangan salni tom·anio, Assam-ni skotong minister gitcham aro Congress dolni namen gamchatgipa dilgipa Pa Tarun Gogoi baksana a·songni gipin political dilgiparangkoba mande ra·aniko dakangjolaha.
Unomiting, warachakgipa dolni dilgipa Dr. Mukul Sangma-ba a·dokni MLA sakgni Pa David A. Nongrum sagi aro Dr. Azad Zaman sagimaangko gisik ra·ate uni kalimani kattarangkoba aganangpaaha.
Una agreba, Meghalaya-oni gital chasongni politician-rang — Pa G. Mylliemngap (Home Minister gitcham), Pa Edward Kurbah (MLA gitcham) aro Pa DN Joshi (MLA gitcham) iamang gimikkoba House-o tom·anio gisik ra·angjolaha.
