Shillong, Nov 5: Rajabala, Mawryngkneng aro Mawphlang constituency-o gital seokako man•gipa MLA sakgittam, Sukrobar salo Meghalaya Legislative Assembly-o ku•mikchetangaha.
Gital MLA-rangni ku•mikchetani somoio NPP-ni MLA-rang, UDP-ni dilgiparang aro Congress MLA HM Shangpliang-ba dongpae bak ra•angaha.
An•tangni ku•mikchetani ja•mano kobor ra•timgipa manderang baksa agangrikengon, ua an•tangni constituency-nasan ong•aigija a•dok gimiknan dangdike on•gen ine Mawryngkneng-ni gital MLA Pyniaid Sing Syiem, ku•rachakaniko on•angaha. Bilsisa atana kamko ka•aniara una neng•nikanirang ong•naba gnang indiba ua an•tangni man•a dipet kamrangko matchotatna jotton ka•gen ineba Syiem aganaha.
Apsan daken, Mawphlang-ni gital MLA Eugeneson Lyngdoh-ba uni pagipa SK Sunn sagini jumangrangko chu•sokgipa ong•atna ku•rachakaniko on•angaha.
Rajabala-ni gital MLA Abdus Saleh-ba ku•mikchetani ja•man kobor ra•timgipa manderang baksa agangrikengon, a•dokna NPP bang•a namgnirangko ra•baahani giminsa manderang uamangko seokaha ine parakataha.
Rajabala constituency-o NPP-ni candidate-rang changsaba chea dongkujachim indiba manderang NPP-chi dilenggipa sorkarini kamrangko nikesa ia chango NPP-ko seokaha ineba Saleh aganaha.
