Shillong, Mar 6: Ri Bhoi a•jani Byrnihat-o state-of-the art industrial estate dakna ra•gipa acre 137 a•arangara reserved forest ba kanggimin buring bolgrimrang ong•ja aro manderangni nangnikaniko ra•chengesa ia kamko sorkari ka•aigen ine Bristibar salo, Meghalaya a•dokni Chief Minister Conrad K Sangma talataniko on•angaha.
Byrnihat-o donggipa a•arangko industrial estate dakna a•dok sorkarini miksongenggipani bidingo Assembly-o Mawryngkneng MLA Heaving Stone Kharpran-ni sing•anina aganchakaniko on•angengon, iako manderang ma•sisretenga indiba da•o dipet ia biaprangko kanggimin buring bolgrimrang ine segata dongkuja ine Chief Minister parakataha.
Bakande ia biapo karkanarangko kuligen ia katta ong•ja ine talataniko on•angengon, da•o dipet ia a•arangko soil & water department aro horticulture department-oniko sorkariona ra•jitanichisa kamko a•bachengkuaigen ine Chief Minister aganaha.
Sorkarina on•enggipa a•arangni pal ia department ge•gnina dingtang dingtang a•arangko on•skagen ineba Chief Minister parakataha.
Ia biapni apalaniko talatangskaengon, ian hajal acre ong•gipa biap ong•ja indiba acre 137 ong•gipa a•arangsan ong•aia aro ianoni acre 127-de soil department-ni aro acre 10-de horticulture department-ni ong•a ine Sangma aganaha.
Ia biapko state-of-the-art industrial estate daknasa miksongenga aro ia kamko ka•anio sorkari, maming niamrangko pe•na miksongani dongja ineba Chief Minister talataniko on•angaha.
Meghalaya Investment Promotion Agency (MIPA)-ko ra•gatanio Land Transfer Act-ko pe•e private company-rangna sorkari a•arangko on•na sienga ine kenchaktokenggipani bidingo talataniko on•angskaengon, Land Transfer Act-ara chengonin a•dokni manderangko chel•chakgipa niam ong•e Meghalaya a•dokna namen gamchatbegipa niamba ong•a aro iako sorkari maming dakeba pe•na miksongani dongja ine Sangma aganaha.
Sorkarini ra•gatna miksongenggipa Gaming Act-ko jegaltokengani giminba talataniko on•angengon, manderangni skani gride ia sorkari maming kamrangkon skatang jako ra•e ka•jawa ine Chief Minister parakataha.
Na·simang ia video-koba nina man·gen:
Na·simang iakoba poraina man·gen: Banggriani aro gipin a•sel ong•ani somoio simsaksoani Mock Drill-ko Rongram-o dake mesoka
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
