SHILLONG, Nov 24: Ma·mong sorkarini ra·chakanggimin Citizenship Amendment Act (CAA)ko niam gita ra·galpilchina dabianga baksa Meghalaya a·doko Inner Line Permit (ILP)ko ra·gatchina dingtangmancha dabie Khasi Students’ Union (KSU) mijalo a·songni Prime Minister Pa Narendra Modi-na chittiko sedoangaha.
Prime Minister-na seatgipa chittio, taridapgimin niamko ra·galchina dabiengon darang jat ba toromni kosako chakatna miksongani ong·ja, indiba jat, torom aro ma·mal basegija mongsongbate Bangladesh-chini katbrangbagipa manderangni bang·barorobae a·dokni chong·mot songpanggipa manderangko ka·sinsin pripna kenchaksoanirang dongani giminsa ong·a,” ine KSU janapataha.
India-ni a·bri-a·kong jolo songdonggipa tribal manderangba a·songni gipin jatrang gitan apsan India-ni manderangan ong·a ine janapatengon, a·songni bak-rengsi ong·e dongbaaniko mikkangchi rakkiangna gita pangchakani aro naljokanirangko on·anio apsandaken nangchongmotgipa ong·a ine chatro dol janapataha.
Chong·mot songpanggipa manderangni jelbra-jelsuanirang komikuenggipa a·dok-chigaona a·palchini gipin manderangni napbaroroaniko nichokkina aro nambate champengsoanirangko dakna gitade Bengal Eastern Frontier Regulation 1873 ba ILP-an nambatgipa chol ong·enga ineba KSU janapataha.
India a·songni bak ong·pagia salgro-salaramni bang·bata a·dokrangon indakgipa champenganirang donganichi uandakgipa a·dokrangode a·jani chong·mot songpanggipa manderangni jelanirangko nama tiktak rakkina gita cholrangko man·enga ine KSU janapkuaha.
“Mijamangmang, maan ra·ako man·na kragipa nang·ni office-o 2019 bilsini December jao Manipur a·dokna ILP-chi champengatani niamko on·angaha jekon a·doko songdonggipa manderang gisik-ka·tong gimikchi ra·chaktokaha. Da·o, Inner Line Permit dongkugijagipade mangmang Meghalaya., Assam aro Tripura a·dok damgittamsan ong·aiaha,” ineba chatro ua chittio janapataha.
Indo-Nepal Friendship Treaty 1950-ni niamoniko Meghalaya a·dokko watchangchina mol·molanio, KSU ia apsankon CAA-naba janape, a·song damgni melie soi ka·grikaniko dakanichi jeon songdonggipa Nepali jatna maming a·selrang grian India-ni mande ong·kamna gita bilko on·ani ong·achim, da·o uani biterang Meghalaya-na namen namjabegipa ong·aha ine aganaha.
“1980 bilsi jolrangonin, Meghalaya a·doko Nepali jatni inditan jelaniko nikna man·engaha jechin bang·pagijagipa tribal jatna kenchakanirang gnang aro uni a·selan maming chanchisogijagipa kajia-golmalrang jatgnini gisepo ong·enga,” ineba KSU uamangni chittio janapatkuaha.
Dolni minggipin dabianiranga, 8th Schedule-o Khasi ku·sikko chapatani bidingo ong·a, jekon KSU dingtangmancha ma·mongo mol·molaha. Ian skangoni dabibaenggipa ong·a jekon Khasi Authors’ Society-chi skang 1960 bilsi jolrangon India sorkarini chanchiaona ra·angaha. Iana agreba, Meghalaya aro Assam a·dok damgnini gisepo sima-arini kajia-golmalko namatani cholrangko ra·gatani gimin aro pangkamgipa Central Agricultural University-ko Meghalaya-o a·bachengate on·ani giminba KSU uamangni seatgipa chittio janapatjolaha.
