Baghmara, Oct 26: Meghalaya-ni skanggipa Skotong Minister Capt. Williamson A. Sangma ni chang 30 gipa siani salko October 25 tariko South Garo Hills ni skotong songjinma Baghmara-o chugipa gadangni bewlalo gisik ra·e manianio a·dokni Skotong Minister Pa. Conrad K. Sangma, Home Minister Pa. Lakhmen Rymbui, Baghmara ni MLA Pa. Samuel M. Sangma aro Siju Rongara ni MLA Pa. Rakkam A. Sangma, sorkarini Officialrang aro joltangni manderang similgipa aro nitogipa pulni bibalrangko done bak ra·angaha.
Tom·aniona dal·batgipa sokgipa ong·e Capt. Sangma sagini bimangko kang·kare srekona tarigipa mangkrongko oprakjole jinmana aganengon Pa. Sangma, Capt. Sangma-ko uni siani salosan pul rangko mangkrong ka·mao done gisik ra·ainabe indiba uni krengdile man·e donanggipa Meghalaya a·dokna ka·saachi uko mande ra·jringbo ine aganaha.
A·dokko atchiatanio jak dongpagiparang, Capt. Williamson A. Sangma, Pa. Nichols Roy, Pa. B.B.Lyngdoh aro gipin dilgiparangko bang·bataan ia sal somoirango gisik ra·jaha aro uamangni on·kange ding·ol gramchie kam ka·anirangkoba dal·e ra·jaha ian an·chingni gualani ong·a. Meghalaya a·dokko an·chingni man·aniara bilongen rasong chabeani ong·a maina uko an·chingni pagitcham ma·gitcham rang krengdile an·tangtangni dedrang su·drangna a·kange donangaha, da·alo bang·a tribal jat rangan an·tangtangna a·dokko dabianio chu·sokgijanirangko an·ching nikatna man·gen ineba Pa. Sangma aganaha.
Capt. Sangma saksa gisiko aro bebeo miksonga gnang dontonggija nishanona daarigipa ong·a, neng·nikanirang sokbaoba ua batesa tikkelaniko bilakbatatgipa ong·a aro neng·nikanirangko cheaniosa chu·sokgipa ong·a ineba bebe ra·gipa ong·a, uni namgipa gun aro bewalrangko dal·drobaenggipa chamdambe sakantian daksninggipa ong·a nanga ineba Pa. Sangma aganaha.
Skotong Minister, Capt. Sangma ko gisik ra·na tarigipa biapko namdapatna Sorkarioni tangka gong Lakh 25 ko chammanaha ineba jinmana parakaha.
Apsan salon, Skotong Minister Pa. Conrad K. Sangma, Home aro Education Minister Pa. Lakmen Rymbui, Baghmara ni MLA Pa. Samuel M. Sangma, Siju-Rongara ni MLA Pa. Rakkam A. Sangma, DHTE aro DSEL ni Director Pa. Ambrose Ch. Marak, Sorkarini Officialrang aro joltangni manderangni bak ra·paanio Baghmara-ni Capt. Williamson Memorial Govt. College ni gitalgipa College nokko rikchakatna pangchakani ro·ongkoba songjolangaha.
Siju Rongara ni MLA Pa. Rakkam A. Sangma 2022 bilsina skangan ia College nokko matchotatna kam rangko ka·china Skotong Minister-ko molmolengon, matchotatbebegenode an·tangko Baghmara ni mande ine aganna darangnaba krat cha·jawaha ine aganaha.
Tom·aniona sokbapagipa a·doni Education Minister Pa. Lakmen Rymbui jinmana aganpaengon, Meghalaya a·dokni atchianiona Capt. Williamson A. Sangma ni rakbee kam ka·anirangko janape a·dok sorkarini skia pora ni a·ba ko namdapatna aro bilakdapatna re·mikkangengani rangko aganaha.
Mongsonggipa sokgipa ong·e aganskaengon Pa. Conrad K. Sangma, a·doko lekka porani a·bako bilakdapatroroni aro poraichakram biaprangko apalbatroroatanian Sorkarini skani aro nishan ong·a , ia chasongo bida gri gipa mande maming kamrangkon ka·na chol ong·ja ine chadambe rangni gisepo u·iahanichi bang·aan a·gilsakni seng·aniko see ra·na jotton ka·tokengaha ine aganaha.
Meghalaya a·dok mangmangon bilsi 16 oni 20 gapgipa chadamberang, School ni gadangko ga·bate Higher Secondary Section aro College rango poraignigipa rangko hisape nion sak hajal 15 mangni gita donga indiba poraichakramode sak hajal 3 na san biap dongskaaia, da·oni chane bilsi 5 ni ja·manode indakgipa gadango poraignigipa chadamberang sak hajal 18 ona tang·dogen, bilsi 10 ni ja·mano sak hajal 19 aro bilsi 15 ni ja·manode sak hajal 24 ona tangdoskagnok ine nikna man·soenga.
Poarichakram rangko bimang ong·dapatjaode aro biaprangko baridapatjaode 10% chadamberangsan poraina chol ong·aignok ine niksamsoe Sorkari skia pora ni a·bako nishan done bang·a tangka paisa rangko chamaha aro sakanti chadambekon watgalgija bida ko on·na ja·ku ga·enganiko dongtongjawa aro mikkangchiba Sorkari iako daito ra·e kam ka·gen ineba Pa. Sangma aganaha.
Bon·kamao, mitelpilskaani kattarangko College ni Principal Dr. Meena A. Sangma agane tom·aniko dontongaha.
