Shillong, Oct 30: Salgro-salaram a·jaona Don Bosco-ni Salesian-rangni sokbani bilsi ritchasa gapaniko a·doko manianganiko, Robibar salo Shillong Laitumkhrah-ni Cathedral of Mary Help of Chiristians-o Holy Eucharistic-ko dakangenba matchotataha.
Ia bilsi 100 gapaniko re·anggipa October 28 tarikoni Youth Expo-ko ong·ate manichakataha, uandake Shillong, Cathedral of Mary Help of Christians-o soka-chake bang·a susaatanirangko ong·atgipao salgro-salaram a·jani dingtang dingtang biaprangoni chadamberang re·bae bakko ra·angtokaha.
Salni tom·anio, Holy Eucharistic Mass-ko Nepal aro India-ni Nuncio, Leopoldo Girelli-chi dakdilanggipao bang·a hajal manderang bakko ra·angtoka baksana, Shillong-ni Arch Bishop, Victor Lyngdoh aro a·dokni aroba salgro-salaram gimikchini pilak parish-rangni pamongrang, a·dokni skotong minister Pa Conrad K Sangma aro gipin cabinet minster-rangba bak ra·angtokpaaha.
Ia maniani bidingo Nuncio-ni talataniko on·anganio, skang 1921 bilsini June 21 tariko salgro-salaram a·jaona Don Bosco-ni Salesian-rang sokbaaha aro uandake Guwahati, Dimapur aro Shillong-na sakgittam province-rangko songangaha ine parakatan baksa, salgro-salaram a·jani manderangna on·kange kamrangko ka·anina Don Bosco-ni salesian-ko dingtangmancha mittelpilangjolaha.
