Tura, May 6: Garo Hills Autonomous District Council (GHADC)-o kam ka·enggipa Non-Gazetted Employees Association (NGEA), man·na nangenggipa ja 33-ni dormaharangko on·kujaengani gimin, kamtangtangko ka·gija jingjengatengon, mija Butbar salo GHADC-ni gital CEM, Pa Benedic R. Marak jingjengataniko dontonge kamtangtangko ka·pilchina uamangna sal 3 somoiko on·angaha aro uni gisepon kamtangtangko ka·jagenchimode, kamoniko ra·galgen ine songbado see parakatanina NGEA-ni dilgiparang talataniko on·atskaaha.
NGEA-ni jakrikra Pa Brithen Sangma-ni talatani gitade, NGEA-ni dilgiparang changgnina kingking gital CEM aro MDC-rangko gronge memorandum-ko on·ahachim, indiba maming ka·dongataniko on·na man·jaha.
“Man·gni dormaharangko on·china aro GHADC-ni jakrikrako kam ra·galchina chingni dabianian mongsonggipa ong·a, indiba chingni dabiako CEM chingna on·na bil dongja. Uni gisepon, chingko kam ra·galna ka·mikkenate sal 3 somoiko on·aniara ra·chakna amgijani ong·a. Unbaksana, chingni kam ka·gija dontongata gimik ja 5 batjok ine CEM-ni tol·e songbado seataniko raken jegala, maina chingni kam ka·gija dontongaoni ja 2 sal 10 mangsan ong·kuenga,” ine NGEA dilgipa talatdapaha.
Uni janapatkuani gita, “Chinga NGEA-ni gadango kam ka·enggiparangsan duk-mikchi ong·e an·tangtangni man·gniko on·jaengani gimin chinga, chingni gitasa kamrangko ka·gija dontongenga, officer-rang, gital EC-rang, MDC-rang aro manderangni GHADC office-ona re·baaniko chinga maming dakeba champengja. Officer-rang re·bae kamtangko ka·echina do·gako kulie on·enga aro gital EC-rang re·bae chokkitangtango asonge kamko ka·na man·aigen aro songdongenggipa manderang an·tangtangni nanganina office-ona re·bana gita man·aigen. Uni gimin chingna jegitaba ka·mikkenataniko on·china, chingni dabiako chu·sokatja dipet aro ka·dongatani kattarangko lekkao see on·ja dipetna chinga kamtangko ka·angkujawa”.
Ia gital Executive Committee, chingni duk-mikchiko ma·sichake dakchakaniko on·gen ine chinga ka·dongsoachim, indiba maming ka·donganiko on·na man·jaha. CEM, chingni dabiako on·genchimode chinga kusi ong·en kamtangtangko ka·angpilgen,” ineba Pa Brithen Sangma janapatjolaha.
