Jowai, Dec 6: East Jaintia Hills a•jao donggipa cement karkanarango sorkarini tik ka•e on•gimin gita kilometre-prako aro metric ton-prako gong 7 ka•e ra•china dabianiko knachakjaengani gimin Sombar sal dipet Jaintia Hills Truck Owners Association (JHTOA), ia cement karkanarango jakkalenggipa truck garirangko an•tangtangni karkanarangona re•angpilchina dabie, jingjengatna gita a•bachengataha.
Sorkarini u•iatgimin gita kilometre-prako aro metric ton-prako gong 7 ka•e ra•china dabian baksana cement karkanarangni godown-ko Byrnihat-ona apjitangpilchina aro truck-rangko jakkalengon, JHTOA-ni membor ong•enggipa manderangoni truck-rangkosa jakkalchina gita association dabiengachim ine nikna man•a.
Indake ong•engon, Sombar salo association-ni gita jingjengataniko a•bachenganio dikdiksa membor-rang tom•e chanchirimangenba, uamangni dabianirangko chu•sokatkujaskal jingjengataniko dongtongjana gitaba tik ka•angjolaha.
Ia jingjengatanio JHTOA-ni president Nidamon Chullet-ba bakko ra•angengon, maming so•sojengjeng ong•atani gri tom•tomao jingjengatchina association-ni memborskarangko didiangaha.
Indake ong•engon, December 7 tarik dipetde uamang cement karkanaona re•baenggipa aro re•angenggipa pilak garirangkon champengatgnok ineba JHTOA-ni president u•iataha.
