Shillong, March 26: Songsalni namgnina dangdike on·gipachi adita salrangna skang, tangka-paisarangko oke ra·aha indiba Garo Hills-ni dingtang dingtang project-rangko matchotata dongja ine matnange lekka sedoanina ASP-ni chu·gimik nirokatani ning·o Williamnagar police-ko ua mamlako sandirokatchina gita ge·etaniko on·e Lokayukta-ni bichal ka·e on·anggipako Meghalaya -ni High Court mija Bristibar salo mamlani gimin kachario bichalanganiko dikdiksana dondipatangaha.
Songsalna dandike on·enggipa Pa N Marak, cha·bokani mamlao GHADC-ni Chairman Pa Denang T Sangma aro sak 17 gipinrangni kosako mokordoma ka·angaha.
Ia mamlako Justice More knaataha. Mamlako jako ra·gipa ukil Pa Sujit Dey-ni iani bidingo che·em che·em talate on·angani gita, “2021-ni writ petition nombor 120 aro 2021-ni writ petition nombor 121, ia minggni writ petition ba kachario bichal ka·e on·china mol·mole sedoangipako mande ra·ako man·na kragipa Lokayukta-ni minggni dingtang dingtang ge·etaniko on·anganiko ra·biangaha. Mingsara, Willaimnagar constituency-o cha·bokanio nangchapa aro minggipinara Garo Hills Autonomous District council-o nangchapgipa ong·skaachim. 2021-ni writ petition nombor 120 ba Willaimnagar constituency-ni mamlao, Lokayukta-ni bichal ka·e on·na man·ani bilni nalsao ong·ani gimino Lokayukta-ni ge·etaniko chinga ra·biangaha.
“Mamlani bidingo je ge·etanikon ua on·ahachim ian uni bichal ka·e on·na man·ani nalsao ong·aha aro Lokayukta-ni niam gita ong·jachim, uni gimin chinga iako Bristibar salo ra·biangaha aro mamlako mande ra·ako man·na kragipa Justice More knaataha aro Lokayukta-ni rai on·anganiko dikdiksana dondipatangaha,” ine Pa Dey taldapataha.
Mamlao Lokayukta-ni ge·etanganiara, Pa N Marak-ni nalis ka·anggipako FIR dake ra·china aro iako Williamnagar Police-chi sandirokataniko dakangchina gita ong·achim.
Minggipin mamlara, District Council Affairs department-ni Commissioner aro Secretary-ko Garo Hills Autonomous District Council (GHADC)o tangka gong kror 43-mangko jakkalsretaha ine matnanganirangko sandirokatchina gita Lokayukta-ni ge·etaniko on·anganikoba apsan salon Meghalaya-ni High Court, mamlani gimin bichalaniko dondipatangaha.
Cha·bokani minggni mamlarangni bidingo Non-Gazetted Employees Association (NGEA)ni badi ka·doanganiko knatimangani ja·man Lokayukta ua ge·etanirangko on·ahachim. Indake ong·engon, Lokayukta-ni ge·etaniko NPP dolni MDC Pa Dipul Marak, Meghalaya-ni High Court-ona iako ra·ange ra·biangskaaha aro ia mamlako ukil Pa Sujit Dey, uni palo jako ra·angaha.
