By Cherra Marak
Salantion songbadrangko poraiengon bang∙bata changon Power Minister James Sangma ni gimin matnanganirangkosa nikrongbata. Sorkariko chalaienggipara bia saksa sanma ine basakobade chanchi man∙pila. Ma sorkariko dilenggiparangoni dos dakbatgipara biasanma? Iakon ui∙na aro ma∙sina man∙pilja, maina indita bilsi je sorkari ong∙omangba indakgipa saksa mande mangmangko jaksi otako nikrongbeja.
Adita salrangna skangsan an∙ching Saubhagya Scheme-o gong kror 149-ko jakkalsretaha ine CAG interim reportko Shillong times-o janapataniko poraiman∙soaha. Saubhagya Scheme ian a∙doko songdongenggipa manderangna mongsongbate kangal cholgrirangna bijolirangko sringe on∙na ma∙mong sorkarini ra∙gatgipa scheme ong∙a. Ia kattarangara baditana kingking kakket ong∙a uko darangba name ui∙kuja aro am∙sandianirangko dakengkua. Indiba iarango pangchake dingtang dingtang dolni dilgiparang jekai Congress, Hynniewtrep Youth Council(HYC), UDP, BJP dolni dilgiparang, Power Minister James Sangma ko Minister Incharge oniko ra∙galna dabianiko dakenga. An∙ching nipilatgenchimode nikatna man∙gen, re∙anggipa changoba uko Home Minister ong∙aoniko, koelako sruk sruk bikotanirangko aro badinganirangko dontongatna man∙jaani bidingo ra∙galaniko man∙aha.
Indake ong∙genchimoba da∙alo Pa Rymbui, Home Minister-ko jako ra∙e kam ka∙genchimoba apsandakgipa obostarangan ong∙kuenga. Jekai meja re∙anggipa jaoba sriksrik koelako bikotenggipa a∙kolo sakbonga manderang siahachim. Aro Garo Hills-ni bakoba South Garo Hills a∙jaoniko Lockdown-ni somoirango mangba sruksruk koela salanirangko nike NGO dolrangni sing∙doanirangko aro songdongenggipa manderangni social media platform-rango agan-janapatanirangko niksona man∙aha. Unbaksana Education Department-o sera bera ong∙giparangni bidingo darang dolni dilgiprangan ku∙saba iani gimin janapa dongja, sing∙sandianirang dongja aro minister in-chargekoba kamoniko ra∙galna dabianirangko dakja. Apsandaken re∙anggipa jao Assam a∙doko merong bag lakhsa rim∙a man∙ani bidingoba darangba Minister incharge ko ra∙galna dabianirangko dakanirang dongja. Ma ua a∙selrangde songdongenggipa manderangnara ramramaigipa kattasan ong∙aiama? Indiba jensalo Pa Sangmani Department-o on∙tisa gualanirang dongahaode pangnan uko kamoniko ra∙galna dabianirangko nikronga.
MeECL-o obosta ong∙giparang gitalgipa obosta ong∙ja ine plakan masia, maina bilsi chikkingna batpilgipa gro-rang gnang aro re∙anggipa somoio sorkari chalaianggipaba name dake nirokangna man∙jaha. Je mandeba Power Minister ong∙genchimoba ia obosta rangoni naljokatna maming dakeba indita ru∙utgija somoini bako donggengipa obosta rangoniko naljokatna man∙chongmotjawa. Ia katta rangko aganon, je nokdang jao hajal chikking beton man∙e gro gong lakh sa ra∙gipako ja gittam ni somoio chotpilna ge∙eta gita maming dingtangja. Man∙anin chu∙ongjaode maikai indita gro rangko chotpilna kan∙dikbegipa somoio chu∙sokatna man∙gen? Ia obosta rangko namdapatna gitan, an∙chingni Power Minister aro Chief Minister Pa Conrad Sangma dingtang mancha independent inquiry ko a∙bachengatengaha.
Opposition doloni Pa Zenith Sangma aro Dr. Mukul Sangmaba pangnan ua saksa kosan jaksi ote aganronga aro kamoniko ra∙galna dabianirangko dakronga. Indiba a∙doko gipin dolrangni ba minister-rangni gualanirangkode dal∙e ra∙rongbreja gita nika. James Sangmani kosako matnanganirangko daka gita apsandake gipin Ministerangni kosakoba, gualanirang ba dos rang donggenchimode sing∙doanirangko dakna nanga maina uan opposition rangni kam ong∙a. Indake ong∙genchimoba bang∙bata changon uamang-ba gipin Minister-rangni kosakode indakgipa jegalanirangko aro sing∙doanirangko dakrongja, indiba A∙chikskakosa pangnan jegale aganronganiko nikna man∙a. Ma Khasi Minister-rangnade uamangra kenama? Ma jensalo NPP-chi dilenggipa sorkari be∙ahaode uamang baksa bakrimpajawa ine chanchien uamangni kosakode mamingkoba agananirangko dakskajaengama?
Apsandaken UDP dol-ni dilgiparangba, MDA baksa bakrime kam ka∙genchimoba, James Sangmani kam-o maiba on∙tisa gualanirangko nikahaode uko kamoniko ra∙galnasa dabironga. Uamangde sorkari baksa bakrime kam ka∙engani gimin batesa sorkario neng∙nikanirangko ku∙monge kam ka∙esa namatpilna jotton ka∙na nangachim. Indiomangba uamang jensalo sorkario neng∙nikanirangko man∙ahaode dakchakani pal batesa galona jotton ka∙ronga. Indiba doltangni minister-rangni dakgualanirangko pangnan donuna jotton ka∙rongbata aro uamangni kosakode maming dakgipa action ra∙anirangkoba nikrongja.
Angni chanchiani gitade UDP dolni dilgiparangba, an∙tang doltangni manderangna gimik dakgipa bilrangko ra∙gope sorkariko chalaina miksonganirang dongani a∙selsa indakgipa matnanganirangko aro su∙dodoanirangko dakenga ine chanchiata.
(The views and comments expressed are purely of the author and Hub News is not responsible for them in any way)
