Tura, Feb 27: Tura-o Asian Development Bank (ADB)-ni gong kror 7.76 tangkarangko dakchake on·anichi ‘Supporting Human Capital Development’ scheme-ni ning·o gital rikgipa Indian Technical Institute (ITI)-ni gital nokko da·al Sonibar salni bako Meghalaya a·dokni Chief Minister Conrad K Sangma, nokdonggae on·angaha aro ia ITI-ni gital nokko nokdonggae on·angani somoio ua jinmana aganprakangengon, chadamberangko a·gilsakni kamrangna tarianio ITI gita dakgipa institute ba skie on·chakram biaprangko a·dokna nangchongmota ine parakangaha.
Chadamberangna a·gilsakni seng·aniko on·an baksana janggi tangani cholrangko on·na gita jakni kamrangko skie on·na gita Tura-oba ia ITI-ko Welder, Fitter aro Carpentry-ni minggittam trade-rang baksa 1965 bilsio kuliahachim aro uni ja·man 1975 bilsio Stenography-ko, 1976 bilsio Mechanic Motor Vehicle-ko aro 1981 bilsio Electrician trade-rangkoba ia ITI-o kulidapaha.
2014 bilsio Surveyor, Draughtsman Mechanical aro Draughtsman Civil trade-rang gnang ia ITI-o World Bank project ‘Vocational Training Improvement Project-koba ra·gataha.
ADB-ni ning·o ia ITI-na gital nokko rikanichi Electronic Mechanic, Dressmaking, Catering & Hospitality Assistant aro Operator Advance Machine Tools trade-rangkoba a·bachengataha.
ITI-rangni gamchatgipa ong·ani gimin janapangengon, “Chadamberangko a·gilsakni kamrangna tarianio kolrangni jakkalani aro jakni kamrangni gimin skie on·na nangchongmota,” ine Chief Minister parakataha.
“Bilsiantian sak 50,000-mangni chadamberang kamrangko jako ra·enga aro indita chadamberangni kam ka·anirangko nie an·ching chadamberangna kamrangko on·na gita cholrangko sandina nanga. Chadamberangko uamangni changa sapani aro jakni kamrango pangchake kamrangko ka·na man·na gita chinga niamko tarigen,” ineba Chief Minister parakataha.
Labour department-ni kamrangko mittelpile aganangengon, ia department-o dingtanganiko ra·bana gita Deputy Chief Minister-ni dilanichi department-o kam ka·enggiparang rakbee kamko ka·enga ine Chief Minister parakataha.
Ia ITI-ni gital nokko nokdonggae on·angani somoio a·dokni Deputy Chief Minister Prestone Tynsong-ba jinmana aganprakengon, “ITI aro uandakgipa institute-rango skie ra·enggipa manderangna sorkari stipend-rangko bariatna tik ka·aha. Sorkarini kamrangosan pangchake dongaigija an·tangtangan bading chiwalani ba uandakgipa karkanarangko a·bachengna man·na gita jakni kamrangko skie ra·china anga chadamberangko didienga,” ine parakataha.
