Shillong, July 18: Sombar salo, Two Wheelers Taxi Association (TWTA)-ni dilgiparang, Transport department-ni Commissioner & Secretary-ko grongenba, gital permit-ko ra•gatkujaskal, chakka samgni donggipa garirangkoba para sale cha•na on•kuchina didiangaha.
Iani bidingo kobor ra•timgiparangna talatangengon, chakka samgni donggipa garirangko para sale cha•enggipa bang•bata manderangan chadamberangsa ong•e maming gipin janggi tangani cholrang dongja aro da•o chakka samgni donggipa garirangni para salaniko champengataniara, para sale cha•enggipa manderangna neng•nikanirangko ra•baani gita ong•engaha ine TWTA-ni general secretary Khrawkular Mawton parakataha.
Ia manderangoni bang•batan loan-rangko ra•esa bike aro scooter-rangko breahachim indiba da•o chakka samgni donggipa garirangni para salaniko sorkari champengatahani a•sel ia chadamberang, loan-rangko gampilanioba neng•nikanirangko man•na nangengaha ineba Mawton parakataha.
Meghalaya Taxi Aggregator Operational Rules 2020-ko taridape, para sale cha•enggipa manderangna dakchakanirangko on•china gitaba TWTA-ni general secretary, a•dok sorkariko didiataha.
