Shillong, Oct 28: A·doktangoni chadamberangni kamgri ong·ani batroroenganina aro chadamberangna kamrangko on·na man·gijanina a·dok sorkarini kosako jegale jinma re·jomaniko dakdilenggipa Federation of Khasi Jaintia and Garo People (FKJGP) baksana, a·dokni dingtang dingtang NGO-rang jekai KSU, RBYF, HNYF dolrangba Sukrobar salo Motphran-oni Madan Iewrynghep (Firebrigade Ground)-ona re·jomanganio bakko ra·angtokpaaha.
Re·jomanio, Shillong songjinmani rama jolgimik gappile sorkarini kosako chrik-a·boke NGO-rang jegalangtokaha aro re·jomangmiting somoio rama re·pakanggipa, tempo salgipa gipin jatrangkoba dokjoljolangtokaha ine knasona gita man·aha, indake ong·oba FKJGP-ni dilgiparang uamangko skatang manderangko jak sokjachina gita raken beng·tokskaaha. Uandake, jinma re·jomaniko a·bachengata tapan ramasamo dokan dakgiparang gimikan chiptokaha aro gari-gorarangni wengwatanirangkoba nikna neng·aha.
Biaponiko kobor man·soani gitade, adita ge motorcycle-rang baksana kobor ra·timgiparangni gari bolgni aro police gari bolsako uamang nosto ka·angaha, unbaksanaba ramako re·pakanggipa adita sak gipin jatrangkoba dokjol-satjol dakangaha ine knasona gita man·aha.
Ia obostarang ong·ani bidingo, FKJGP-ni president Dundee Khongsit-ni talataniko on·anganio, salni bako adita golmalrang ong·ani ja·pangde kam gri ong·enggipa chadamberangni ka·a ding·ani a·selsa ong·aha ine parakataha.
Indake ong·engon, tom·tom re·jomangmiting somoio chanchisogijagipa obostarang ong·anina suk ong·jan baksana Khongsit, iana dingtangmancha kemako bi·angenba, rally a·bachengna skangan sakanti bakko ra·gipa chadamberango ian tom·tom re·jomanisa ong·aigen ine mol·molanikoba dakahachim, indiba iarang ong·gen inede chingaba chanchisoa dongjachim ine ua talatanikoba on·angaha.
“Dilgipa ong·e, rally-o bakko ra·gipa chasong damberango namen ka·a ding·doaniko anga niksoaha, maina iamangoni mitamara 2019 bilsio police-ni kamna galgipani result-ko parakatgipao biming dongpagijagiparang ong·achim”, ineba Khongsit agandapataha.
