Bengaluru, Aug 24: Indian Space Research Organisation (ISRO)-ni watatgipa Chandrayaan-3, Budbar attamni 6:04 bajio jajongni salgipengchipak onchongeani ja·man India a·song itihasko taritaiaha.
Jajongona re·ange onchongeanio USA, Russia aro China a·songrangni ja·man India a·songan brigipa ong·aha indiba jajongni salgipengo onchonganiode India a·songan skanggipa ong·skaaha.
Antisamangna skangsan Russia a·songni watatgipa Luna-25, jajong-o ‘crash’ ong·ahani gimin Budbar attamo India a·songni watatgipa Chandrayaan-3-ni jajongo onchonganioba a·gilsak gimikan India-chipakko nie dongtokengachim indiba Budbar attamni 6:04 bajio, Chandrayaan-3-ni Lander Module (LM), Lander (Vikram) aro kg 26 ong·gipa Rover (Pragyan), jajongni salgipengo nambee onchongena man·aha.
Jajongo onchongani chu·sokani ja·man, ia Chandrayaan-3-ni Rover (Pragyan), jean metre 500-ona kingking ka·sine re·na man·achim, jajongko re·rurae nianggnok aro man·a dipet jajongni gimin sandie nianggnok.
Iana skang, 2019 bilsioba Chandrayaan-2 Mission-ko apsan daken jajongona watatahachim indiba Lander-ni braking system-o adita nosto ong·anirang donge, 2019 bilsini September-ni 7 tariko, ia Chandrayaan-2 Mission-ni ‘Vikram’ lander, jajongo bilona skangmangmang crash ong·ahachim.
SpaceTec Partners-ni consultant Carla Filotico-ni parakatani gitade, ia Chandrayaan-3-ni jajongo onchonganiara India a·songna namen gamchatbegipa ong·aha aro ia mission ba kamko chu·sokatanichi India a·songni technology-ni gita tang·doaniko mesokna chol ong·gnok.
Jajongo tin·kagimin chirang donga ine India-ni skang watatchenggipa Chandrayaan-1 nikbamanahani gimin ia Chandrayaan-3-ni jajongo onchonganichi jajongo tin·kagimin chirangko nambate sandina man·gnok ineba ua aganaha.
Chandrayaan-3 Mission-ni jajongo onchongani chu·sokgipa ong·ahani gimin India a·songni Prime Minister Narendra Modi-ba kusi ong·aniko parakatenba, iani bidingo a·songni manderangnaba namgipa skaniko parakataha.
Chandrayaan-3-ni jajongo bilonaniko ISRO-ni scientist-rang baksa video conference gita niengmiting somoio a·songni manderangna aganprakatengon, “An·ching gital India-ni gital songreaniko nikna man·enga. Iachi da·alo gital itihasko seaha,” ine Prime Minister Modi parakataha.
Iakoba poraie nina man·gen: Mizoram-o rel ramana dollong kagipa be·grue a·sel ong·anichi sak 17 a·damon sikama
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
