Tura, Nov 21: Rama ga·nanggijagipa a·briko dosusaatani aro bakkandikgipa somoio ta·rakprete salsusaataniko ong·atanga baksa Jengjal, Marakgre aro Asibra, Dodinanggre biaprango Tura Motor Sports Club (TMSC)ni ong·atgipa chang 6-gipa Bilgaro 4W gari salsusaataniko adita an·saoatangachi Robibar salo matchotataha.
Chakka sambri gnanggipa 4-wheel (4W) garirangna dintangmancha ong·atgipa ia susaatanio gimik-gimang sak 21 mangni gita bakko ra·angaha.
Salgnina ong·atgipa ia susaanio, a·songni dingtang dingtang biaprangoni jekai Delhi, Dimapur, Kohima, Shillong aroba gipin biaprangchini re·bae iano bak ra·eaniko nikangna gita man·aha. Susaataniko, Class-I-o 1300 CC-ona, Class-2-o 1300 CC-na batgipana, Class-3-o SUV aro Overall ba gimikna gadang-bri dake ong·atangaha.
Ia gari salsusaaniko GHADC-ni Chief Executive Member, Pa Benedic R. Marak-chi nisanko ripripe Goeragre-oni a·bachengchakataha, jeni ja·man a·bri dosusaataniko Jengjal, Marakgre-o ong·ataha. Indake, Asibra, Dodinanggre-o bakkandikgipa somoio ta·rakprete gari salsusaaniko ong·atskaenba apsan salon chegiparangna boksisrangkoba salni bako mongsonggipa ong·e sokgipa GHADC-ni Executive Member (Taxation) Pa Grahambell A Sangma-ni jakchi on·angjolaha.
Susaaniko ong·atgipa biapo uni kan·dike jinmana agananganio, ua dingtang dingtang biaprangchini re·bae bakko ra·egipa gari salgiparangko rimchaksoenba iandakgipa susaatanirangko ong·atna nangenganiko aganangaha. Unbaksana, bakkandika somoio u·iatachi ia gari salsusaaniko ong·atanio dingtang dingtang ra·bianirang donganikoba ua aganangaha.
Ia susaanio bakko ra·e chegiparangna trophy-rangko on·anga baksana iano bakko ra·gipa gimiknan medal-rangkode on·angaha. Overall class-o nambatgipa ong·e chegipa sakgittamnan gong lak 1.80 mang tangkarangko boksis on·aha.
Unbakana, gong hajal 20,000 tangkakoba TMSC, Dodinanggre-ni Nokma-na on·gilbajolaha.
Ia susaaniko gadang-bri dake ong·atgipao chegiparangara – Class -1-o skanggipa boksisko Sandeep Sharma-na on·aha, gnigipako Abhigyan Dowania-na aro gittamgipako Ruchir C Marak-na on·angaha.
Class- 2-o skanggipani boksisko Ryan Silkam M Sangma man·angaha, gnigipako Andy Donald Mawrie aro gittamgipa Ewelson Lyngdoh man·angskaaha.
Class -3 SUV-o chegipa Larry Mukhim, skanggipa boksisko ra·chakangaha, gnigipako Thingku N Marak aro gittamgipako Ruchir C Marak ra·chakangskaaha. Indake ong·engon, gimikna susaatgipa ba Overall-o skanggipako Larry Mukhim man·aha, gnigipako Sandeep Sharma, gittamgipako Ryan Silkam M Sangma, brigipako Ewellson Lyngdoh
aro bongagipa boksisko Andy Donald Mawrie man·angaha.
