Shillong, May 3: Changbrigipa Meghalaya Games 2022-ko Mongolbar salo, Meghalaya a•dokni Chief Minister Conrad K Sangma, Shillong songjinmani First Ground-o donggipa SSA Stadium-o a•bachengate on•angaha.
Ia Meghalaya Games-o ming 19 kal•susaanirangko ong•atengon, gimik sak 2,500 kal•susagiparang bakko ra•enga aro ia kal•susaaniko Sports & Youth Affairs Department baksa nangrime sokachakengani gimin a•dokni Chief Minister, dingtangmancha Meghalaya State Olympic Association (MSOA)-ko mittelpilangaha.
Mikkang bilsio ia Meghalaya Games-ko Tura-o sokachakskagen aro uni ja•man 2024 bilsio Jowai-o sokachakgen ineba ia tom•bimonganio Chief Minister parakataha.
Chief Minister-ni parakatani gitade, ia bilsio Meghalaya Games-ko Meghalaya a•dokni bilsi 50 gapaniko maniani bak gita ong•atjolenga aro ian da•o brigipa changna ong•atengoba batanggimin bilsibrini gisepode gnigipa changsan ong•engachim.
Ia Meghalaya Games-ko a•dok sorkari 2020 bilsiosa tangatpiltaiaha ine janapatengon, ian a•dok sorkarini kal•susaaniko namdapatna aro mongsongbate a•dokni chadamberangna gisik on•e kam ka•aniko mesokani ong•enga ine Sangma parakataha.
Ia Meghalaya Games-o bak ra•na re•anggiparangko biap namgijao sokachaksoahani gimin an•tangni suk ong•gijaniko parakatengon, iandakgipa dal•gipa kal•susaanirangko sokachakanio dingtang dingtang neng•nikanirangde dongaia ine ia kal•susaaniko ong•atahani gimin MSOA-ko mittelpilangaha.
Meghalaya Games-o bak ra•na re•anggiparangko biap namgijao sokachakahani gimin kal•susana re•anggipa manderangni suk ong•gijaniko social media-rango parakatani ja•man, Chief Minister an•tangan ua biaprangona re•ange, ja•mano kal•susana re•anggipa manderangko nambata biaprango donatskaahachim.
Ia Meghalaya Games-ko a•bachengate on•angani somoio a•dokni Sports & Youth Affairs Minister Banteidor Lyngdoh aro gipin dilgiparangba dongpae bakko ra•angaha.
